โส กิร เอกํ นฏกีฬํ กีฬมาโน วิจรนฺโต สตฺถุ ธมฺมกถํ สุตฺวา ปพฺพชิตฺวา อรหตฺตํ ปาปุณิ. ตสฺมึ พุทฺธปฺปมุเขน ภิกฺขุสงฺเฆน สทฺธึ ปิณฺฑาย ปวิสนฺเต, ภิกฺขู เอกํ นฏปุตฺตํ กีฬนฺตํ ทิสฺวา "อาวุโส เอส ตยา กีฬิตกีฬิตํ กีฬติ, อตฺถิ นุโข เต เอตฺถ สิเนโหติ ปุจฺฉิตฺวา "นตฺถีติ วุตฺเต, "อยํ ภนฺเต อภูตํ วตฺวา อญฺญํ พฺยากโรตีติ อาหํสุ. สตฺถา เตสํ กถํ สุตฺวา "ภิกฺขเว มม ปุตฺโต สพฺพโยเค อติกฺกนฺโตติ วตฺวา อิมํ คาถมาห

"หิตฺวา มานุสกํ โยคํ ทิพฺพํ โยคํ อุปจฺจคา,

สพฺพโยควิสํยุตฺตํ ตมหํ พฺรูมิ พฺราหฺมณนฺติ.

ตตฺถ "มานุสกํ โยคนฺติ: มานุสกํ อายุญฺเจว ปญฺจ กามคุเณ จ. ทิพฺพโยเคปิ เอเสว นโย.