ยถาพลํ กริสฺสามิ อุทานสฺสตฺถวณฺณนํ.

อิติ อากงฺขมานสฺส สทฺธมฺมสฺส จิรฏฺฐิตึ

วิภชนฺตสฺส ตสฺสตฺถํ สาธุ คณฺหนฺตุ สาธโวติ.

ตตฺถ อุทานนฺติ เกนฏเฐน อุทานํ? อุทานฏฺเฐน. กิมิทํ อุทานํ นาม? ปีติเวคสมุฏฺฐาปิโต อุทาหาโร. ยถา หิ ยํ เตลาทิ มินิตพฺพวตฺถุ ปมาณํ ๒- คเหตุํ น สกฺโกติ, วิสฺสนฺทิตฺวา คจฺฉติ. ตํ "อวเสโก"ติ วุจฺจติ. ยญฺจ ชลํ ตฬากํ คเหตุํ น สกฺโกติ, อชฺโฌตฺถริตฺวา คจฺฉติ, ตํ "โอโฆ"ติ วุจฺจติ. เอวเมว ยํ ปีติเวคสมุฏฺฐาปิตํ วิตกฺกวิปฺผารํ อนฺโตหทยํ สนฺธาเรตุํ น สกฺโกติ, โส อธิโก หุตฺวา อนฺโต อสณฺฐหิตฺวา พหิ วจีทฺวาเรน นิกฺขนฺโต ปฏิคฺคาหกนิรเปกฺโข อุทาหารวิเสโส "อุทานนฺ"ติ วุจฺจติ. ธมฺมสํเวควเสนปิ อยมากาโร ลพฺภเตว.