"เอวเมวํ ปนายนฺ"ติ เอตฺถ ครหณากาโรติ วุตฺตนเยน โยเชตพฺพํ. โส จ ครหณากาโร "วสลี"ติอาทิขุํสนสทฺทสนฺนิธานโต ๑- อิธ เอวํสทฺเทน ปกาสิโตติ วิญฺญายติ. ยถา เจตฺถ, เอวํ อุปมา การาทโยปิ อุปมาทิวเสน วุตฺตานํ ปุปฺผราสิอาทิสทฺทานํ สนฺนิธานโต วุตฺตาติ เวทิตพฺพํ.

"เอวญฺจ วเทหี"ติ ยถาหํ วทามิ, เอวํ สมณมานนฺทํ วเทหีติ วทนากาโร อิทานิ วตฺตพฺโพ เอวํสทฺเทน นิทสฺสิยตีติ "นิทสฺสนตฺโถ"ติ วุตฺตํ.

"เอวํ โน"ติ เอตฺถาปิ เตสํ ยถาวุตฺตธมฺมานํ อหิตทุกขาวหภาเวน สนฺนิฏฺฐานชนนตฺถํ อนุมติคฺคหณวเสน "โน วา กถํ โว เอตฺถ โหตี"ติ ปุจฺฉาย กตาย "เอวํ โน เอตฺถ โหตี"ติ วุตฺตตฺตา ตทาการสนฺนิฏฺฐานํ เอวํสทฺเทน อาวิกตํ. โส ปน เตสํ ธมฺมานํ อหิตาย ทุกฺขาย สํวตฺตนากาโร นิยมิยมาโน อวธารณตฺโถ โหตีติ วุตฺตํ "เอวํ โน เอตฺถ โหตีติอาทีสุ อวธารเณ"ติ.

เอวมาการวิเสสวาจีนมฺปิ เอเตสํ เอวํสทฺทานํ อุปมาทิวิเสสตฺถวุตฺติตาย อุปมาทิอตฺถตา วุตฺตา, "เอวมฺภนฺเต"ติ ปน ธมฺมสฺส สาธุกํ สวนมนสิกาเร