@๔ ฉ.ม. เถรสเตหิ ๕ ฉ.ม. ยา โลเกติ น ทิสฺสติ ๖ ฉ.ม., อิ. สุตํ ยสฺส จ ภาสิตํ, ตํ สพฺพํ กเถตุกาเมน "เอวํ ภาสิตํ มยา สุตํ, เอกํ สมยํ ภาสิตํ, ภควตา ภาสิตํ, สาวตฺถิยํ ภาสิตํ, เทวตาย ภาสิตนฺ"ติ เอตมตฺถํ ทสฺเสนฺเตน อายสฺมตา อานนฺเทน วุตฺตํ "เอวมฺเม สุตํ เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม อถโข อญฺญตรา เทวตา อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา เยน ภควา เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิ เอกมนฺตํ ฐิตา โข สา เทวตา ภควนฺตํ คาถาย อชฺฌภาสี"ติ. เอวมิทํ อายสฺมตา อานนฺเทน วุตฺตํ, ตญฺจ ปน ปฐมมหาสงฺคีติกาเล วุตฺตนฺติ เวทิตพฺพํ.

อิทานิ "กสฺมา วุตฺตนฺ"ติ เอตฺถ วุจฺจเต:- ยสฺมา อยมายสฺมา มหากสฺสปตฺเถเรน นิทานํ ปุฏฺโฐ, ตสฺมา เนน ตํ นิทานํ อาทิโต ปภูติ วิตฺถาเรตุํ วุตฺตํ. ยสฺมา วา อายสฺมนฺตํ อานนฺทํ ธมฺมาสเน นิสินฺนํ วสีคุณปริวุตํ ทิสฺวา เอกจฺจานํ เทวตานํ จิตฺตมุปฺปนฺนํ "อยมายสฺมา เวเทหิมุนิ ๑- ปกติยาปิ สกฺยกุลนฺวโย ๒- ภควโต ทายาโท, ภควตาปิ ปญฺจกฺขตฺตุํ เอตทคฺเค นิทฺทิฏฺโฐ, จตูหิ อจฺฉริยพฺภูตธมฺเมหิ สมนฺนาคโต, จตุนฺนํ ปริสานํ ปิโย มนาโป, อิทานิ มญฺเญ ภควโต ธมฺมรชฺเช ทายชฺชํ ๓- ปตฺวา พุทฺโธ ชาโต"ติ. ตสฺมา อายสฺมา อานนฺโท ตาสํ เทวตานํ เจตสา เจโตปริวิตกฺกมญฺญาย ตํ อพฺภูตสมฺภาวนํ อนธิวาเสนฺโต อตฺตโน สาวกภาวเมว ทีเปตุํ อาห "เอวมฺเม สุตํ เอกํ สมยํ ภควา ฯเปฯ อชฺฌภาสี"ติ. เอตฺถนฺตเร ปญฺจ อรหนฺตสตานิ อเนกานิ จ เทวตาสตสหสฺสานิ ๔- "สาธุ สาธู"ติ อายสฺมนฺตํ อานนฺทํ อภินนฺทึสุ. มหาภูมิจาโล อโหสิ, นานาวิธกุสุมวสฺสํ อนฺตลิกฺขโต ปตติ, ๕- อญฺญานิ จ พหูนิ อจฺฉริยานิ ปาตุรเหสุํ, พหุนฺนญฺจ เทวตานํ สํเวโค อุปฺปชฺชิ "ยํ อมฺเหหิ ภควโต สมฺมุขา สุตํ, ตํ อิทาเนว ปโรกฺขํ ๖- ชาตนฺ"ติ. เอวมิทํ อายสฺมตา อานนฺเทน ปฐมมหาสงฺคีติ- กาเล วทนฺเตนาปิ อิมินา การเณน วุตฺตนฺติ เวทิตพฺพํ. เอตฺตาวตา จ "วุตฺตํ เยน ยทา ยสฺมา, เจตํ วตฺวา อิมํ วิธินฺ"ติ อิมิสฺสา อฑฺฒคาถาย อตฺโถ ปกาสิโต โหติ.