"เทฺว โข อาวุโส ปจฺจยา อนิมิตฺตาย เจโตวิมุตฺติยา

สมาปตฺติยา, สพฺพนิมิตฺตานญฺจ อมนสิกาโร, อนิมิตฺตาย จ

ธาตุยา มนสิกาโร"ติ. ๑-

อยมฺปเนตฺถ สมาปชฺชนกฺกโม:- ผลสมาปตฺติตฺถิเกน อริยสาวเกน รโหคเตน ปฏิสลฺลีเนน อุทยพฺพยาทิวเสน สงฺขารา วิปสฺสิตพฺพา. ตสฺเสวํ ๒- ปวตฺตานุปุพฺพวิปสฺสโต สงฺขารารมฺมณโต โคตฺรภุญาณานนฺตรํ ๒- ผลสมาปตฺติวเสน นิโรเธ จิตฺตมปฺเปติ, ผลสมาปตฺตินินฺนภาเวน จ เสกฺขสฺสาปิ ผลเมว อุปฺปชฺชติ, น มคฺโค. เย ปน วทนฺติ "โสตาปนฺโน อตฺตโน ผลสมาปตฺตึ สมาปชฺชิสฺสามีติ วิปสฺสนํ วฑฺเฒตฺวา สกทาคามี โหติ, สกทาคามี จ อนาคามี"ติ. เต วตฺตพฺพา:- เอวํ สนฺเต อนาคามี อรหา ภวิสฺสติ, ๓- อรหา จ ปจฺเจกพุทฺโธ ๓- อาปชฺเชยฺย, ตสฺมา ยถาภินิเวสํ ยถาชฺฌาสยํ วิปสฺสนา อตฺถํ สาเธตีติ เสกฺขสฺสาปิ ผลเมว อุปฺปชฺชติ, น มคฺโค. ผลมฺปิ ๔- ตสฺส สเจ อเนน ปฐมชฺฌานิโก มคฺโค อธิคโต, ปฐมชฺฌานิกเมว อุปฺปชฺชติ. สเจ ทุติยาทีสุ อญฺญตรชฺฌานิโก, ทุติยาทีสุ อญฺญตรชฺฌานิกเมวาติ.