นิทสฺสนตฺเถน "นาหํ สยมฺภู, น มยา อิทํ สจฺฉิกตนฺ"ติ อตฺตานํ ปริโมเจนฺโต "เอวมฺเม สุตํ, มยา เอวํ สุตนฺ"ติ อิทานิ วตฺตพฺพํ สกลสุตฺตํ นิทสฺเสติ.

อวธารณตฺเถน "เอตทคฺคํ ภิกฺขเว มม สาวกานํ ภิกฺขูนํ พหุสฺสุตานํ ยทิทํ อานนฺโท, คติมนฺตานํ, สติมนฺตานํ, ธิติมนฺตานํ, อุปฏฺฐากานํ ยทิทํ อานนฺโท"ติ ๒- เอวํ ภควตา ปสฏฺฐภาวานุรูปํ อตฺตโน ธารณพลํ ทสฺเสนฺโต สตฺตานํ โสตุกมฺยตํ ชเนติ "เอวมฺเม สุตํ, ตญฺจ โข อตฺถโต วา พฺยญฺชนโต วา อนูนมนธิกํ, เอวเมว, น อญฺญถา ทฏฺฐพฺพนฺ"ติ.

เมสทฺโท ตีสุ อตฺเถสุ ทิสฺสติ. ตถาหิสฺส "คาถาภิคีตํ เม อโภชเนยฺยนฺ"ติ เอวมาทีสุ ๓- มยาติ อตฺโถ. "สาธุ เม ภนฺเต ภควา สงฺขิตฺเตน ธมฺมํ เทเสตู"ติ เอวมาทีสุ ๔- มยฺหนฺติ อตฺโถ. "ธมฺมทายาทา เม ภิกฺขเว ภวถา"ติ เอวมาทีสุ ๕- มมาติ อตฺโถ. อิธ ปน "มยา สุตน"ติ จ "มม สุตนฺ"ติ จ อตฺถทฺวเย วตฺตติ. ๖-

สุตนฺติ อยเมตฺถ สุตสทฺโท สอุปสคฺโค อนุปสคฺโค จ คมนขฺยาติ ๗- ราคาภิภูตูปจิตานุโยคโสตวิญฺเญยฺยโสตทฺวารวิญฺญาตาทิอเนกตฺถปฺปเภโท. ตถา หิสฺส "เสนาย ปสุโต"ติ เอวมาทีสุ คจฺฉนฺโตติ อตฺโถ. "สุตธมฺมสฺส ปสฺสโต"ติ เอวมาทีสุ ๘- ขฺยาตธมฺมสฺสาติ อตฺโถ. "อวสฺสุตา อวสฺสุตสฺสา"ติ เอวมาทีสุ ๙- ราคาภิภูตา ราคาภิภูตสฺสาติ อตฺโถ. "ตุเมฺหหิ ปุญฺญํ ปสุตํ อนปฺปกนฺ"ติ เอวมาทีสุ ๑๐- อุปจิตนฺติ อตฺโถ. "เย ฌานปฺปสุตา ธีรา"ติ เอวมาทีสุ ๑๑- ฌานานุยุตฺตาติ อตฺโถ. "ทิฏฺฐํ สุตํ มุตนฺ"ติ เอวมาทีสุ ๑๒- โสตวิญฺเญยฺยนฺติ อตฺโถ.