ติกฺขตฺตุํ "อกฺกุโล ปกฺกุโล"ติ อกฺกุลปกฺกุลิกมกาสีติ ตโย วาเร "อกฺกุโล ปกฺกุโล"ติ ภึสาเปตุกามตาย เอวรูปํ สทฺทมกาสิ. อนุกรณสทฺโท หิ อยํ. ตทา หิ โส ยกฺโข สิเนรุํ อุกฺขิปนฺโต วิย มหาปฐวี ปริวตฺเตนฺโต วิย จ มหตา อุสฺสาเหน อสนิสตสทฺทสงฺฆาฏํ วิย เอกสฺมึ ฐาเน ปุญฺชีกตํ หุตฺวา วินิจฺฉรนฺตํ ทิสาคชานํ หตฺถิคชฺชิตํ, ๓- เกสรสีหานํ สีหนินฺนาทํ, ยกฺขานํ ๔- หุงฺการสทฺทํ, ภูตานํ มหาสทฺทํ ๔- อสุรานํ อปฺโผฏนโมสํ, อินฺทสฺส เทวรญฺโญ วชิรนิคฺฆาตนิคฺโฆสํ, ๕- อตฺตโน คมฺภีรตาย วิปฺผาริกตาย ภยานกตาย จ อวเสสสทฺทํ อวหสนฺตมิว อภิภวนฺตมิว จ กปฺปวุฏฺฐานมหาวาตมณฺฑลิกาย วินิคฺโฆสํ ปุถุชฺชนานํ หทยํ ผาเลนฺตํ วิย มหนฺตํ ปฏิภยนิคฺโฆสํ อพฺยตฺตปทกฺขรํ ๖-

@๓ ม. ทีปิราชานํ กตคชฺชิตํ ๔-๔ ฉ.ม. หึสการสทฺทํ, ภูตานํ อฏฺฏหาสํ

@๕ ก. วชิรนิปฺโผสนิคฺโฆสํ ๖ ฉ.ม. อพฺยตฺตกฺขรํ ติกฺขตฺตุํ อตฺตโน ยกฺขคชฺชิตํ คชฺชิ "เอเตน อิมํ สมณํ ภึสาเปตฺวา ปลาเปสฺสามี"ติ. ยํ ยํ นิจฺฉรติ, เตน เตน ปพฺพตา ปปฏิกํ มุญฺจึสุ, วนปฺปติเชฏฺฐเก อุปาทาย สพฺเพสุ รุกฺขลตาคุมฺเพสุ ปตฺตผลปุปฺผานิ สีทยึสุ, ติโยชนสหสฺสวิตฺถโตปิ หิมวนฺตปพฺพตราชา สกมฺปิ สมฺปกมฺปิ สมฺปเวธิ, ภุมฺมเทวตา อาทึ กตฺวา เยภุยฺเยน เทวตานมฺปิ อหุเทว ภยํ ฉมฺภิตตฺตํ โลมหํโส, ปเคว มนุสฺสานํ. อญฺเญสญฺจ อปททฺวิปทจตุปฺปทานํ มหาปฐวิยา อุนฺทฺริยนกาโล วิย มหตี วิภึสนกา อโหสิ, สกลชมฺพุทีปตเล มหนฺตํ โกลาหลํ อุทปาทิ. ภควา ปน ตํ สทฺทํ "กิมี"ติ อมญฺญมาโน นิจฺจโล นิสีทิ, "มา กสฺสจิ อิมินา อนฺตราโย โหตู"ติ อธิฏฺฐาสิ.