ตํ เอกํ กปาลํ คเหตฺวา วุตฺตนิยาเมน สุปฺปารกปฏฺฏเน ปิณฺฑาย จรนฺตํ ทิสฺวา มนุสฺสา จินฺเตสุํ "สเจ โลเก อรหนฺโต นาม โหนฺติ, เอวํวิเธหิ ภวิตพฺพํ, กินฺนุ โข อยํ อยฺโย วตฺถํ ทียมานํ คเณฺหยฺย, อุทาหุ อปฺปิจฺฉตาย น คเณฺหยฺยา"ติ วีมํสนฺตา นานาทิสาหิ วตฺถานิ อุปเนสุํ. โส จินฺเตสิ "สจาหํ อิมินา นิยาเมน นาคมิสฺสํ, นยิเม เอวํ มยิ ปสีเทยฺยุํ, ยนฺนูนาหํ อิมานิ ปฏิกฺขิปิตฺวา อิมินาว นีหาเรน วิหเรยฺยํ, เอวํ เม ลาภสกฺกาโร อุปฺปชฺชิสฺสตี"ติ. โส เอวํ จินฺเตตฺวา โกหญฺเญ ฐตฺวา วตฺถานิ น ปฏิคฺคณฺหิ. มนุสฺสา "อโห อปฺปิจฺโฉ วตายํ อยฺโย"ติ ภิยฺโยโส มตฺตาย ปสนฺนมานสา มหนฺตํ สกฺการสมฺมานํ กรึสุ.

โสปิ ภตฺตกิจฺจํ กตฺวา อวิทูรฏฺฐาเน เอกํ เทวายตนํ อคมาสิ. มหาชโน เตน สทฺธึ เอว คนฺตฺวา ตํ เทวายตนํ ปฏิชคฺคิตฺวา อทาสิ. โส "อิเม มยฺหํ

@๓ ฉ.ม. นิวาสนปาวุรณานิ, เอวมุปริปิ จีรธารณมตฺเต ปสีทิตฺวา เอวํวิธํ สกฺการสมฺมานํ กโรนฺติ, เอเตสํ มยา อุกฺกฏฺฐวุตฺตินา ภวิตุํ วฏฺฏตี"ติ สลฺลหุกปริกฺขาโร อปฺปิจฺโฉว หุตฺวา วิหาสิ. "อรหา"ติ ปน เตหิ สมฺภาวียมาโน "อรหา"ติ อตฺตานํ อมญฺญิ, อุปรูปริ จสฺส สกฺการครุกาโร อภิวฑฺฒิ, ลาภี จ อโหสิ อุฬารานํ ปจฺจยานํ. เตน วุตฺตํ "เตน โข ปน สมเยน พาหิโย ทารุจีริโย สุปฺปารเก ปฏิวสติ สมุทฺทตีเร สกฺกโต โหติ ๑- ครุกโต"ติอาทิ.