"อุโภ ปุตฺตา กาลกตา ปนฺเถ มยฺหํ ปตี มโต

มาตา ปิตา จ ภาตา จ เอกจิตกมฺหิ ฌายเร"ติ ๑- วตฺวา ชาตรูเปเนว จรนฺติยา "สตึ ปฏิลภาหิ ภคินี"ติ ภควโต วจนสมนฺตรเมว อุมฺมาโท วูปสมิ, ตถา สุปฺปิยาปิ อุปาสิกา อตฺตนาว อตฺตโน อูรุยํ กเตน มหาวเณน วุฏฺฐาตุํ อสกฺโกนฺตี สยนปิฏฺเฐ นิปนฺนา "อาคนฺตฺวา มํ วนฺทตู"ติ วจนสมนฺตรเมว วเณ ปากติเก ชาเต สยเมว คนฺตวา ภควนฺตํ วนฺทีติเอวมาทีนิ วตฺถูนิ อิธ อุทาหริตพฺพานีติ.

เอวํ ภนฺเตติ ภนฺเต ยถา ภควา สปุตฺตาย มาตุยา ๒- อโรคภาวํ อาสึสนฺโต อาห "สุขินี อโรคา อโรคํ ปุตฺตํ วิชายตู"ติ, ตํ เอวเมว. น หิ กทาจิ พุทฺธานํ ภควนฺตานํ วจนสฺส อญฺญถาภาโวติ อธิปฺปาโย. เกจิ ปน "เอวมตฺถู"ติ วทนฺติ, อปเร "โหตู"ติ ปทสฺส อตฺถํ อาเนตฺวา วณฺณยนฺติ. อภินนฺทิตฺวาติ กรวีกรุตมญฺชุนา พฺรหฺมสฺสเรน ภควตา วุจฺจมาเน ตสฺมึ วจเน ปีติโสมนสฺสปฏิลาภโต อภิมุขภาเวน นนฺทิตฺวา. อนุโมทิตฺวาติ ตโต ปจฺฉาปิ สมฺโมทนํ อุปฺปาเทตฺวา, จิตฺเตน วา อภินนฺทิตฺวา วาจาย อนุโมทิตฺวา,