ภควาติ คุณวิสิฏฺฐสตฺตุตฺตมครุคารวาทิวจเมตํ. ยถาห:-

ภควาติ วจนํ เสฏฺฐํ ภควาติ วจนมุตฺตมํ

ครุ คารวยุตฺโต โส ภควา เตน วุจฺจตีติ.

จตุพฺพิธญฺหิ นามํ อาวตฺถิกํ ลิงฺคิกํ เนมิตฺตกํ อธิจฺจสมุปฺปนฺนนฺติ. อธิจฺจสมุปฺนํ นาม "ยทิจฺฉกนฺ"ติ วุตฺตํ โหติ. ตตฺถ วจฺโฉ ทโม ๑- พลิพทฺโทติ เอวมาทิ อาวตฺถิกํ, ทณฺฑี ฉตฺตี สิขี กรีติ เอวมาทิ ลิงฺคิกํ, เตวิชฺโช ฉฬภิญฺโญติ เอวมาทิ เนมิตฺตกํ, สิริวฑฺฒโก ธนวฑฺฒโกติ เอวมาทิ วจนตฺถมนเปกฺขิตฺวา ปมตฺตํ อธิจฺจสมุปฺปนฺนํ. อิทมฺปน ภควาติ นามํ คุณเนมิตฺตกํ, น มหามายาย, น สุทฺโธทนมหาราเชน, น อสีติญาติสหสฺเสหิ กตํ, น สกฺกสนฺตุสิตาทีหิ เทวตาวิเสเสหิ กตํ. ยถาห อายสฺมา สาริปุตฺตตฺเถโร "ภควาติ เนตํ นามํ มาตรา กตํ ฯเปฯ สจฺฉิกา ปญฺญตฺติ ยทิทํ ภควา"ติ. ๒-