อถโข ภควา อายสฺมนฺตํ มหาโมคฺคลฺลานํ อามนฺเตสีติ กสฺมา อามนฺเตสิ? สุปฺปวาสาย สามิกสฺส ปสาทรกฺขณตฺถํ. ๑- สุปฺปวาสา ปน อจลปฺปสาทาว, อุปาสกสฺส ปน ปสาทรกฺขณํ มหาโมคฺคลฺลานตฺเถรสฺส ภาโร. เตนาห "ตุเยฺหโส อุปฏฺฐาโก"ติ. ตตฺถ ตุเยฺหโสติ ตุยฺหํ เอโส. ติณฺณํ ธมฺมานํ ปาฏิโภโคติ มม โภคาทีนํ ติณฺณํ ธมฺมานํ อหานิยา อวินาสาย อยฺโย มหาโมคฺคลฺลาโน ยทิ ปาฏิโภโค ยทิ ปฏิภู, อิโต สตฺต ทิวเส อติกฺกมิตฺวา มม สกฺกา ทานํ ทาตุนฺติ ยทิ อยฺเยน ญาตนฺติ ทีเปติ. เถโรปิ ตสฺส เตสุ ทิวเสสุ โภคานํ ชีวิตสฺส จ อนุปทฺทวํ ปสฺสิตฺวา อาห "ทฺวินฺนํ โข เนสํ อาวุโส ธมฺมานํ ปาฏิโภโค โภคานญฺจ ชีวิตสฺส จา"ติ. สทฺธา ปนสฺส จิตฺตปฏิพทฺธาติ ตสฺเสว ภารํ กโรนฺโต "สทฺธาย ปน ตฺวญฺเญว ปาฏิโภโค"ติ อาห. อปิจ โส อุปาสโก ทิฏฺฐสจฺโจ, ตสฺส สทฺธาย อญฺญถาภาโว นตฺถีติ ตถา วุตฺตํ. เตเนว จ การเณน ภควตา "ปจฺฉาปิ ตฺวํ กริสฺสสีติ สญฺญาเปหี"ติ วุตฺตํ. อุปาสโกปิ สตฺถริ เถเร จ คารเวน จ สุพฺพจตาย ๒- ตสฺสา จ ปุญฺเญน วฑฺฒึ อิจฺฉนฺโต "กโรตุ สุปฺปวาสา โกลิยธีตา สตฺต ภตฺตานิ, ปจฺฉาหํ กริสฺสามี"ติ อนุชานิ.

ตญฺจ ทารกนฺติ วิชาตทิวสโต ปฏฺฐาย เอกาทสมํ ทิวสํ อติกฺกมิตฺวา ตโต ปรํ สตฺตาหํ พุทฺธปฺปมุขํ ภิกฺขุสํฆํ โภเชตฺวา สตฺตเม ทิวเส ตํ สตฺตวสฺสิกํ