@๑๗ ฉ.ม. พาหิโย ๑๘ อํ. จตุกฺก. ๒๑/๒๔๓/๒๖๗ สํฆเภทกสุตฺต ๑๙ ฉ.ม., อิ. เกวลี

@๒๐ สํ. ขนฺธ. ๑๗/๕๗/๕๐ ๒๑ ฉ.ม....มตฺโถ, อิติ สทฺโท น ทิสฺสติ

กปฺปสทฺโท ปนายํ อภิสทฺทหนโวหารกาลปญฺญตฺติเฉทนวิกปฺปเลสสมนฺตภาวาทิ- อเนกตฺโถ. ตถา หิสฺส "โอกปฺปนียเมตํ โภโต โคตมสฺส, ยถา ตํ อรหโต สมฺมาสมฺพุทฺธสฺสา"ติ เอวมาทีสุ ๑- อภิสทฺทหนมตฺโถ. "อนุชานามิ ภิกฺขเว ปญฺจหิ สมณกปฺเปหิ ผลํ ปริภุญฺชิตุนฺ"ติ เอวมาทีสุ ๒- โวหาโร. "เยน สุทํ นิจฺจกปฺปํ วิหรามี"ติ เอวมาทีสุ ๓- กาโล. "อิจฺจายสฺมา กปฺโป"ติ เอวมาทีสุ ๔- ปญฺญตฺติ. "อลงฺกโต กปฺปิตเกสมสฺสู"ติ เอวมาทีสุ ๕- เฉทนํ. "กปฺปติ ทฺวงฺคุลกปฺโป"ติ เอวมาทีสุ ๖- วิกปฺโป. "อตฺถิ กปฺโป นิปชฺชิตุนฺ"ติ เอวมาทีสุ ๗- เลโส. "เกวลกปฺปํ เชตวนํ ๘- โอภาเสตฺวา"ติ เอวมาทีสุ ๙- สมนฺตภาโว. อิธ ปนสฺส สมนฺตภาโว อตฺโถติ ๑๐- อธิปฺเปโต. ยโต เกวลกปฺปํ เชตวนนฺติ เอตฺถ อนวเสสํ สมนฺตโต เชตวนนฺติ เอวมตฺโถ ทฏฺฐพฺโพ.

โอภาเสตฺวาติ อาภาย ผริตฺวา, จนฺทิมา วิย สุริโย วิย จ เอโกภาสํ เอกปชฺโชตํ กริตฺวาติ อตฺโถ.