อถ ภิกฺขู ตํ ปวตฺตึ ภควโต อาโรเจสุํ. สตฺถา "เตนหิ ภิกฺขเว ตุเมฺหปิ เต มนุสฺเส อิมาย คาถาย ปฏิโจเทถา"ติ วตฺวา "อภูตวาที"ติ คาถมาห. ตํ สนฺธาย วุตฺตํ "อถ โข สมฺพหุลา ฯเปฯ นิหีนกมฺมา มนุชา ปรตฺถาติ ตตถ เนโส ภิกฺขเว สทฺโท จีรํ ภวิสฺสตีติ อิทํ สตฺถา ตสฺส อยสสฺส นิปฺผตฺตึ สพฺพญฺญุตญาเณน ชานิตฺวา ภิกฺขู สมสฺสาเสนฺโต อาห.

คาถายํ อภูตวาทีติ ปรสฺส โทสํ อทิสฺวาว มุสาวาทํ กตฺวา อภูเตน อตจฺเฉน ปรํ อพฺภาจิกฺขนฺโต. โย วาปิ กตฺวาติ โย วา ปน ปาปกมฺมํ กตฺวา "นาหํ เอตํ กโรมี"ติ อาห. เปจฺจ สมา ภวนฺตีติ เต อุโภปิ ชนา อิโต ปรโลกํ คนฺตฺวา นิรยูปคมเนน คติยา สมา ภวนฺติ. คติเยว หิ เนสํ ปริจฺฉินฺนา, อายุ ปน อปริจฺฉินฺนํ. ๑- พหุกํ หิ ปาปํ กตฺวา จิรํ นิรเย ปจติ, ปริตฺตกํ กตฺวา อปฺปมตฺตกเมว กาลํ ปจติ. ยสฺมา ปน เนสํ อุภินฺนมฺปิ ลามกเมว กมฺมํ, เตน วุตฺตํ นิหีนกมฺมา มนุชา ปรตฺถาติ. "ปรตฺถา"ติ ปน ปทสฺส ปุรโต "เปจฺจา"ติ ปเทน สมฺพนฺโธ, เปจฺจ ปรตฺถ อิโต คนฺตฺวา เต นิหีนกมฺมา ปรโลเก สมา ภวนฺตีติ อตฺโถ.

ปริยาปุณิตฺวาติ อุคฺคเหตฺวา. อการกาติ อปราธสฺส น การกา. นยิเมหิ กตนฺติ เอวํ กิร เนสํ อโหสิ:- อิเมหิ สมเณหิ สกฺยปุตฺติเยหิ อทฺธา ตํ ปาปกมฺมํ น กตํ, ยํ อญฺญติตฺถิยา อุคฺโฆเสตฺวา สกลนครํ อาหิณฺฑึสุ, ยสฺมา อิเม อเมฺหสุ เอวํ อสพฺภาหิ ผรุสาหิ วาจาหิ อพฺภาจิกฺขนฺเตสุปิ น กิญฺจิ วิการํ ทสฺเสนฺติ, ขนฺติโสรจฺจญฺจ น วิชหนฺติ, เกวลมฺปน "อภูตวาที นิรยํ อุเปตี"ติ ธมฺมเยว วทนฺตา สปนฺติเยว, อิเม สมณา สกฺยปุตฺติยา อเมฺห อนุปธาเรตฺวา อพฺภาจิกฺขนฺเต สปนฺติ, สปถํ กโรนฺตา วิย ๒- วทนฺตีติ. อถ วา "โย วาปิ กตฺวา `น กโรมี'ติ จาหา"ติ วทนฺตา สปนฺติ, อตฺตโน อการกภาวํ โพเธตุํ อมฺหากํ สปถํ กโรนฺติ อิเมติ อตฺโถ.