เตสุ อิธ อุปปตฺติเทวา อธิปฺเปตา. มนุโน อปจฺจาติ มนุสฺสา. โปราณา ปน ภณนฺติ:- มนสฺส ๒- อุสฺสนฺนตาย มนุสฺสา, เต ชมฺพูทีปกา อปรโคยานิกา ๓- อุตฺตรกุรุกา ปุพฺพวิเทหกาติ จตุพฺพิธา, อิธ ชมฺพูทีปกา อธิปฺเปตา. มงฺคลนฺติ มหนฺติ อิเมหิ สตฺตาติ มงฺคลานิ, อิทฺธึ วุฑฺฒิญฺจ ปาปุณาตีติ อตฺโถ. อจินฺตยุนฺติ จินฺเตสุํ. อากงฺขมานาติ อิจฺฉมานา ปตฺถมานา ปิหยมานา. โสตฺถานนฺติ โสตฺถิภาวํ, สพฺเพสํ ทิฏฺฐธมฺมิกสมฺปรายิกานํ โสภณานํ สุนฺทรานํ กลฺยาณานํ ธมฺมานํ อตฺถิตนฺติ วุตฺตํ โหติ. พฺรูหีติ เทเสหิ ปกาเสหิ, อาจิกฺขาหิ วิวร วิภช อุตฺตานีกโรหิ. มงฺคลนฺติ อิทฺธิการณํ วุฑฺฒิการณํ สพฺพสมฺปตฺติการณํ. อุตฺตมนฺติ วิสฺสิตฺถํ ๔- ปวรํ สพฺพโลกหิตสุขาวหนฺติ ยํ คาถาย อนุปุพฺพปทวณฺณนา. ๕-

อยมฺปน ปิณฺฑตฺโถ:- โส เทวปุตฺโต ทสสหสฺสจกฺกวาเฬสุ เทวตาโย มงฺคลปญฺหํ โสตุกามตาย อิมสฺมึ เอกจกฺกวาเฬ สนฺนิปติตฺวา เอกวาลคฺคโกฏิ- โอกาสมตฺเต ๖- ทสมฺปิ วีสมฺปิ ตึสมฺปิ จตฺตาฬีสมฺปิ ปญฺญาสมฺปิ สฏฺฐิมฺปิ สตฺตติปิ อสีติปิ สุขุมตฺตภาเว นิมฺมินิตฺวา สพฺพเทวมารพฺรหฺมาโน สิริยา จ เตชสา จ อธิคยฺห วิโรจมานํ ปญฺญตฺตปวรพุทฺธาสเน นิสินฺนํ ภควนฺตํ ปริวาเรตฺวา ฐิตา ทิสฺวา ตสฺมิญฺจ สมเย อนาคตานมฺปิ สกลชมฺพูทีปกานํ มนุสฺสานํ เจตสา เจโตปริวิตกฺกมญฺญาย สพฺพเทวมนุสฺสานํ วิจิกิจฺฉาสลฺลสมุทฺธรณตฺถํ อาห:-

พหู เทวา มนุสฺสา จ มงฺคลานิ อจินฺตยุํ

อากงฺขมานา โสตฺถานํ พฺรูหิ มงฺคลมุตฺตมนฺติ.