ตตฺถ ปริมุฏฺฐาติ ทนฺธา มุฏฺฐสฺสติโน. ปณฺฑิตาภาสาติ ปณฺฑิตปติรูปกา "เก อญฺเญ ชานนฺติ, มยเมเวตฺถ ชานามา"ติ ตสฺมึ ตสฺมึ อตฺเถ อตฺตานเมว ชานนฺตํ กตฺวา สมุทาจรณโต. วาจาโคจรภาณิโนติ เยสํ วาจา เอว โคจโร วิสโย, เต วาจาโคจรภาณิโน, วาจาวตฺถุมตฺตสฺเสว ภาณิโน อตฺถสฺส อปริญฺญาตตฺตา. อถ วา วาจาย อโคจรํ อริยานํ กถาย อวิสยํ มุสาวาทํ ภณนฺตีติ วาจาโคจรภาณิโน. อถ วา "โคจรภาณิโน"ติ เอตฺถ อาการสฺส รสฺสภาโว กโต. วาจาโคจรา, น สติปฏฺฐานาทิโคจรา ภาณิโนว. กถํ ภาณิโน? ยาวิจฺฉนฺติ มุขายามํ อตฺตโน ยาว มุขายามํ ยาว มุขปฺปสารณํ อิจฺฉนฺติ, ตาว ปสาเรตฺวา ภาณิโน, ปเรสุ คารเวน, อตฺตโน อวิสยตาย จ มุขสงฺโกจํ น กโรนฺตีติ อตฺโถ. อถ วา วาจาโคจรา เอว หุตฺวา ภาณิโน, สยํ อชานิตฺวา ปรปตฺติกา เอว หุตฺวา วตฺตาโรติ อตฺโถ. ตโตเยว ยาวิจฺฉนฺติ มุขายามํ เยน วจเนน สาเธตพฺพา, ตํ อจินฺเตตฺวา ยาวเทว อตฺตโน มุขปฺปสารณมตฺตํ อิจฺฉนฺตีติ อตฺโถ. เยน นีตา น ตํ วิทูติ เยน มุฏฺฐสฺสจฺจาทินา

นวมสุตฺตวณฺณนา นิฏฺฐิตา.