ตํ ชีวํ ตํ สรีรนฺติ ยํ สรีรํ, ตเทว ชีวสงฺขาตํ วตฺถุ, ยญฺจ ชีวสงฺขาตํ วตฺถุ, ตเทว สรีรนฺติ ชีวญฺจ, สรีรญฺจ อทฺวยํ สมนุปสฺสติ. เอเตน อาชีวกานํ วิย "รูปี อตฺตา"ติ อยํ วาโท ทสฺสิโต โหติ. อญฺญํ ชีวํ อญฺญํ สรีรนฺติ อิมินา ปน "อรูปี อตฺตา"ติ อยํ วาโท ทสฺสิโต.

โหติ ตถาคโต ปรมฺมรณาติ เอตฺถ ตถาคโตติ สตฺตา. ๓- ตํ หิ ทิฏฺฐิคติโก การกเวทกาทิสงฺขาตํ, นิจฺจธุวาทิสงฺขาตํ วา ตถาภาวํ ๔- คโตติ ตถาคโตติ โวหรติ, โส มรณโต อิธ กายสฺส เภทโต ปรํ อุทฺธํ โหติ, อตฺถิ สํวิชฺชตีติ อตฺโถ. เอเตน สสฺสตคฺคาหมุเขน โสฬส สญฺญีวาทา อฏฺฐ อสญฺญีวาทา อฏฺฐ จ เนวสญฺญีนาสญฺญีวาทา ทสฺสิตา โหนฺติ. น โหตีติ นตฺถิ น อุปลพฺภติ. เอเตน อุจฺเฉทวาโท ทสฺสิโต. โหติ จ น จ โหตีติ อตฺถิ จ นตฺถิ จาติ. เอเตน เอกจฺจสสฺสตวาทา สตฺต สญฺญีวาทา จ ทสฺสิตา, เนว โหติ น น โหตีติ อิมินา ปน อมราวิกฺเขปวาโท ทสฺสิโตติ เวทิตพฺพํ.

@๓ สี.,ก. อตฺตา ๔ สี.,ก. ตถาคตภาวํ