๕. จุนฺทสุตฺตวณฺณนา

[๗๕] ปญฺจเม มลฺเลสูติ เอวํนามเก ชนปเท. มหตา ภิกฺขุสํเฆนาติ คุณมหตฺตสงฺขฺยามหตฺเตหิ มหตา. โส หิ ภิกฺขุสํโฆ สีลาทิคุณวิเสสโยเคนาปิ มหา ตตฺถ สพฺพปจฺฉิมกสฺส โสตาปนฺนภาวโต, สงฺขฺยามหตฺเตนปิ มหา อปริจฺฉินฺนคณนตฺตา. อายุสงฺขาโรสฺสชฺชนโต ปฏฺฐาย หิ อาคตาคตา ภิกฺขู น ปกฺกมึสุ. จุนฺทสฺสาติ เอวํนามกสฺส. กมฺมารปุตฺตสฺสาติ สุวณฺณการปุตฺตสฺส,

ปฏิยาทาเปตฺวาติ สมฺปาเทตฺวา. "สูกรมทฺทวนฺติ สูกรสฺส มุทุสินิทฺธํ ปวตฺตมํสนฺ"ติ มหาอฏฺฐกถายํ วุตฺตํ. เกจิ ปน "สูกรมทฺทวนฺติ น สูกรมํสํ, สูกเรหิ มทฺทิตวํสกฬีโร"ติ วทนฺติ. อญฺเญ "สูกเรหิ มทฺทิตปฺปเทเส ชาตํ อหิฉตฺตกนฺ"ติ. อปเร ปน "สูกรมทฺทวํนาม เอกํ รสายตนนฺ"ติ ภณึสุ. ตํ หิ จุนฺโท กมฺมารปุตฺโต "อชฺช ภควา ปรินิพฺพายิสฺสตี"ติ สุตฺวา "อปฺเปวนาม นํ ปริภุญฺชิตฺวา จิรตรํ ติฏฺเฐยฺยา"ติ สตฺถุ จิรชีวิตุกมฺยตาย อทาสีติ วทนฺติ.