เทวกายํ ปริปูเรสฺสนฺตี"ติ. ๓- ตตฺร จ เย สรณคมนูปกฺกิเลสสมุจฺเฉทนสรณํ คตา, เต อปายํ น คมิสฺสนฺติ. อิตเร ปน สรณคมเนน น คมิสฺสนฺตีติ เอวํ คาถาย อธิปฺปาโย เวทิตพฺโพ.

อยนฺตาว เภทาเภทผลทีปนา.

คมนียทีปนา

คมนียทีปนาย โจทโก อาห:- "พุทฺธํ สรณํ คจฺฉามิ"ติ เอตฺถ โย พุทฺธํ สรณํ คจฺฉติ, เอส พุทฺธํ วา คจฺเฉยฺย สรณํ วา, อุภยถาปิ จ เอกสฺส วจนํ นิรตฺถกํ. กสฺมา? คมนกิริยาย กมฺมทฺวยาภาวโต. น เหตฺถ "อชํ คามํ เนตี"ติ อาทีสุ วิย ทฺวิกมฺมกตฺตํ อกฺขรจินฺตกา อิจฺฉนฺติ.