ตถาคตํ สกฺกโรติ ครุกโรติ มาเนติ ปูเชติ ปรมาย ปูชายา"ติ. ๓- เอเตนานุสาเรน ปจฺเจกพุทฺธอริยสาวกานมฺปิ ปูชาย หิตสุขาวหตา เวทิตพฺพา.

อปิจ คหฏฺฐานํ กนิฏฺฐสฺส เชฏฺฐภาตาปิ ภคินีปิ ปูชเนยฺยา, ปุตฺตสฺส มาตาปิตโร, กุลวธูนํ สามิกสสฺสุสสุราติ เอวเมตฺถ ปูชเนยฺยา เวทิตพฺพา. เอเตสมฺปิ หิ ปูชา กุสลธมฺมสงฺขาตตฺตา อายุอาทิวุฑฺฒิเหตุตฺตา จ มงฺคลเมว. วุตฺตญฺเหตํ:-

"เต เมตฺเตยฺยา ภวิสฺสนฺติ เปตฺเตยฺยา สามญฺญา พฺรหฺมญฺญา กุเล เชฏฺฐาปจายิโน, อิทํ กุสลํ ธมฺมํ สมาทาย วตฺติสฺสนฺติ, เต กุสลานํ ธมฺมานํ สมาทานเหตุ อายุนาปิ วฑฺฬิสฺสนฺติ, วณฺเณนปิ วฑฺฒิสฺสนฺตี"ติ อาทิ. ๔-

อิทานิ ยสฺมา "ยํ ยตฺถ มงฺคลํ. ววตฺถเปตฺวา ตนฺตสฺส, มงฺคลตฺตํ วิภาวเย"ติ อิติ มาติกา นิกฺขิตฺตา, ตสฺมา อิทํ วุจฺจติ:- เอวเมติสฺสา คาถาย