เอวํ อิมิสฺสาปิ คาถาย ปฏิรูปเทวาโส จ, ปุพฺเพ จ กตปุญฺญตา, อตฺตสมฺมาปนิธิ จาติ ๓- ตีณิเยว มงฺคลานิ วุตฺตานิ. มงฺคลตฺตญฺจ เนสํ ตตฺถ ตตฺถ วิภาวิตเมวาติ.

นิฏฺฐิตา ปฏิรูปเทสวาโส จาติ อิมิสฺสา คาถาย อตฺถวณฺณนา.

พาหุสจฺจญฺจาติ คาถาวณฺณนา

[๕] อิทานิ พาหุสจฺจญฺจาติ เอตฺถ พาหุสจฺจนฺติ พหุสฺสุตภาโว. สิปฺปนฺติ ยํ กิญฺจิ หตฺถโกสลฺลํ. วินโยติ กายวาจาจิตฺตวินยนํ. สุสิกฺขิโตติ สุฏฐุ สิกฺขิโต. สุภาสิตาติ สุฏฺฐุ ภาสิตา. ยาติ อนิยมนิทฺเทโส. ๔- วาจาติ คิรา พฺยปฺปโถ. เสสํ วุตฺตนยเมวาติ. อยเมตฺถ ปทวณฺณนา.