"สพฺเพสํ ปน ธมฺมานํ สกสามญฺญลกฺขณํ

ตถเมวาคโต ยสฺมา ตสฺมา นาโถ ตถาคโต"ติ.

เอวํ ตถลกฺขณํ อาคโตติ ตถาคโต. (๓)

กถํ ตถธมฺเม ยาถาวโต อภิสมฺพุทฺโธติ ตถาคโต? ตถธมฺมา นาม จตฺตาริ อริยสฺจานิ. ยถาห "จตฺตาริมานิ ภิกฺขเว ตถานิ อวิตถานิ อนญฺญถานิ, กตมานิ จตฺตาริ, อิทํ ทุกฺขํ อริยสจฺจนฺติ ภิกฺขเว ตถเมตํ อวิตถเมตํ อนญฺญถเมตนฺ"ติ ๑- วิตฺถาโร. ตานิ จ ภควา อภิสมฺพุทฺโธ, ตสฺมาปิ ตถานํ อภิสมฺพุทฺธตฺตา ตถาคโต. อภิสมฺโพธนตฺโถ หิ เอตฺถ คตสทฺโท. เอวํ ตถธมฺเม ยาถาวโต อภิสมฺพุทฺโธติ ตถาคโต. (๔)