@๖ ม. อุปริ. ๑๔/๒๙๕/๒๖๖ จูฬกมฺมวิภงฺคสุตฺต

ยถาห "สตฺติเม ภิกฺขเว อปริหานิยา ธมฺมา. กตเม สตฺต, สตฺถุสคารวตา"ติ อาทิ, ๑- ตสฺมา มงฺคลนฺติ วุจฺจติ.

นิวาโต นาม นีจมนตา นิวาตวุตฺติตา, ยาย นิวาตวุตฺติตาย สมนฺนาคโต ปุคฺคโล นิหตมาโน นิหตทปฺโป ปาทปุญฺฉนโจฬกสโม ฉินฺนวิสาณูสภสโม ๒- อุทฺธตทาฐสปฺปสโม จ หุตฺวา สณฺโห สขิโล สุขสมฺภาโส จ โหติ, อยํ นิวาโต นาม. สฺวายํ ยสาทิคุณปฏิลาภเหตุโต มงฺคลนฺติ วุจฺจติ. อาห จ "นิวาตวุตฺติ อตฺถทฺโธ, ตาทิโส ลภเต ยสนฺ"ติ เอวมาทิ. ๓-

สนฺตุฏฺฐี นาม อิตรีตรปจฺจยสนฺโตโส, โส ทฺวาทสวิโธ โหติ. เสยฺยถีทํ? จีวเร ยถาลาภสนฺโตโส ยถาพลสนฺโตโส ยถาสารุปฺปสนฺโตโสติ ติวิโธ. เอวํ ปิณฺฑปาตาทีสุ.