คาถายํ สตฺตสงฺคปฺปหีนสฺสาติ ตณฺหาสงฺโค ทิฏฺฐิสงฺโค มานสงฺโค โกธสงฺโค อวิชฺชาสงฺโค กิเลสสงฺโค ทุจฺจริตสงฺโคติ อิเมสํ สตฺตนฺนํ สงฺคานํ ปหีนตฺตา สตฺตสงฺคปฺปหีนสฺส. เกจิ ปน "สตฺตตานุสยา เอว สตฺต สงฺคา"ติ วทนฺติ. เนตฺติจฺฉินฺนสฺสาติ ฉินฺนภวเนตฺติกสฺส. วิกฺขีโณ ชาติสํสาโรติ ปุนปฺปุนํ ชายนวเสน ปวตฺติยา ชาติเหตุกตฺตา จ ชาติภูโต สํสาโรติ ชาติสํสาโร, โส ภวเนตฺติยา ฉินฺนตฺตา วิกฺขีโณ ปริกฺขีโณ, ตโต เอว นตฺถิ ตสฺส ปุนพฺภโวติ.

ปญฺจมสุตฺตวณฺณนา นิฏฺฐิตา.