ทารกา วุฑฺฒิมนฺวาย กีฬนฺตา วิวาทฏฺฐาเนสุ อญฺเญ โคปาลทารเก หตฺเถนปิ ปาเทนปิ ปหรนฺติ, เต โรทนฺติ. "กิสฺส โรทถา"ติ เอวํ ๔- มาตาปิตูหิ ปุฏฺฐา ๔- "อิเม นิมฺมาตาปิติกา ตาปสโปสิตา อเมฺห อตีว ปหรนฺตี"ติ วทนฺติ ตโต เตสํ มาตาปิตโร "อิเม ทารกา อญฺเญ ทารเก วิเหเฐนฺติ ๕- ทุกฺขาเปนฺติ, น อิเม สงฺคเหตพฺพา, อิเม วชฺชิตพฺพา"ติ อาหํสุ. ตโต ปภูติ กิร โส ปเทโส "วชฺชี"ติ วุจฺจติ, โยชนสตปริมาเณน. ๖- อถ นํ ปเทสํ โคปาลกา ราชานํ โตเสตฺวา อคฺคเหสุํ. ตตฺถ ปน ๗- นครํ มาเปตฺวา โสฬสวสฺสุทฺเทสิกํ กุมารํ อภิสิญฺจิตฺวา ราชานํ อกํสุ. ตาย จสฺส ทาริกาย สทฺธึ วาเรยฺยํ กตฺวา กติกํ อกํสุ "น พาหิรโต ทาริกา อาเนตพฺพา, อิโต ทาริกา น กสฺสจิ ทาตพฺพา"ติ. เตสํ ปฐมสํวาเสน เทฺว ทารกา ชาตา ธีตา จ ปุตฺโต จ, เอวํ โสฬสกฺขตฺตุํ เทฺว เทฺว ชาตา, ตโต เตสํ ทารกานํ ยถากฺกมํ วฑฺเฒนฺตานํ ๘- อารามุยฺยานนิวาสนฏฺฐานปริวารสมฺปตฺตึ คเหตุํ อปฺปโหนฺตํ ตํ นครํ ติกฺขตฺตุํ คาวุตฺตนฺตเรน คาวุตฺตนฺตเรน ปากาเรน ปริกฺขิปึสุ, ตสฺส ปุนปฺปุนํ วิสาลิกตตฺตา เวสาลีเตฺวว นามํ ชาตํ. อิทํ เวสาลีวตฺถุ.

ภควโต นิมนฺตนํ

อยมฺปน เวสาลี ภควโต อุปฺปนฺนกาเล อิทฺธา เวปุลฺลปฺปตฺตา อโหสิ. ตตฺถ หิ ราชูนํเยว สตฺต สหสฺสานิ สตฺต สตานิ สตฺต จ ราชาโน อเหสุํ. ตถา ยุวราชเสนาปติภณฺฑาคาริกปฺปภูตีนํ. ยถาห:-