ตตฺถ "เอวมฺเม สุตนฺ"ติอาทิ ๓- อายสฺมตา อานนฺเทน วุตฺตํ, "ปราภวนฺตํ ปุริสนฺ"ติอาทินา นเยน เอกนฺตริกา คาถา เทวปุตฺเตน วุตฺตา, "สุวิชาโน ภวํ โหตี"ติอาทินา นเยน เอกนฺตริกา เอว อวสานคาถา จ ภควตา วุตฺตา, ตเทตํ สพฺพมฺปิ สโมธาเนตฺวา "ปราภวสุตฺตนฺ"ติ วุจฺจติ. ตตฺถ "เอวมฺเม สุตนฺ"ติอาทีสุ ยํ วตฺตพฺพํ, ตํ สพฺพํ มงฺคลสุตฺตวณฺณนายํ วกฺขาม.

[๙๑] ปราภวนฺตํ ปุริสนฺติอาทีสุ ปน ปราภวนฺตนฺติ ปริหายนฺตํ วินสฺสนฺตํ. ปุริสนฺติ ยํ กิญฺจิ สตฺตํ ชนฺตุํ. มยํ ปุจฺฉาม โคตมนฺติ ๔- เสสเทเวหิ สทฺธึ อตฺตานํ ทสฺเสตฺวา ๕- โอกาสํ กโรนฺโต ๖- โส เทวปุตฺโต โคตฺเตน ภควนฺตํ อาลปติ. ภควนฺตํ ปุฏฺฐุมาคมฺมาติ ๗- มยํ หิ ภควนฺตํ ปุจฺฉิสฺสามาติ ตโต ตโต จกฺกวาฬา อาคตาติ อตฺโถ. เอเตน อาทรํ ทสฺเสติ. กึ ปราภวโต มุขนฺติ เอวํ อาคตานํ อมฺหากํ พฺรูหิ ปราภวโต ปุริสสฺส กึ มุขํ กึ ทฺวารํ กา โยนิ กึ การณํ,

@๓ ก. อาทิกํ ๔ ฉ.ม. โคตมาติ ๕ ฉ.ม. นิทสฺเสตฺวา