[๑๑๒] โสณฺฑินฺติ มจฺฉมํสาทีสุ ๑- โลลํ เคธชาตํ. ๒- วิกิรณินฺติ เตสํ อตฺถาย ธนํ ปํสุกํ วิย วิกิริตฺวา นาสนสีลํ. ปุริสํ วาปิ ตาทิสนฺติ ปุริโส วาปิ โย เอวรูโป โหติ, โย ตํ อิสฺสริยสฺมึ ฐาเปติ, ๓- ลญฺฉนมุทฺทิกาทีนิ ทตฺวา ฆราวาเส วา กมฺมนฺเต วา วณิชฺชาทิโวหาเรสุ วา พฺยาปารํ กาเรติ, ๔- โส ยสฺมา ตสฺส โทเสน ธนกฺขยํ ปาปุณนฺโต ปราภวติเยว, เตนสฺเสตํ อิมาย คาถาย ตถาวิธสฺส อิสฺสริยสฺมึ ฐาปนํ ๕- เอกํเยว ปราภวมุขํ วุตฺตํ.
[๑๑๔] อปฺปโภโค นาม สนฺนิจิตานญฺจ โภคานํ อายมุขสฺส จ ภควโต. มหาตโณฺหติ มหติยา โภคตณฺหาย สมนฺนาคโต, ยํ ลทฺธํ, เตน อสนฺตุฏฺโฐ. ขตฺติเย ชายเต กุเลติ ขตฺติยานํ กุเล ชายติ. โส จ รชฺชํ ปตฺถยตีติ ๖- โส เอตาย รชฺชํ ปตฺถยนกามตาย ๗- มหาตณฺหตาย อนุปาเยน อุปฺปฏิปาฏิยา อตฺตโน ทายชฺชภูตํ อลพฺภเนยฺยํ วา ปรสนฺตกํ วา รชฺชํ ปตฺเถติ, โส เอวํ ปตฺเถนฺโต ๘- ยสฺมา ตมฺปิ อปฺปกํ โภคํ โยธาทีนํ ๙- ทตฺวา รชฺชํ อปาปุณนฺโต ปราภวติเยว, เตนสฺเสตํ อิมาย คาถาย รชฺชปตฺถนํ เอกํเยว ปราภวมุขํ วุตฺตํ.
[๑๑๕] อิโต ปรํ ยทิ สา เทวตา "เตรสมํ ภควา พฺรูหิ ฯเปฯ สตสหสฺสิมํ ภควา พฺรูหี"ติ ปุจฺเฉยฺย, ตมฺปิ ๑๐- ภควา กเถยฺย. ยสฺมา ปน สา เทวตา "กึ อิเมหิ ปุจฺฉิเตหิ, เอกเมตฺถ วุฑฺฒิกรํ นตฺถี"ติ ตานิ ปราภวมุขานิ อสุยฺยมานา ๑๑- เอตฺตกมฺปิ ปุจฺฉิตฺวา วิปฺปฏิสารี หุตฺวา ตุณฺหี อโหสิ, ตสฺมา ภควา ตสฺสา อชฺฌาสยํ ๑๒- วิทิตฺวา เทสนํ สมาเปนฺโต ๑๓- อิมํ คาถํ อภาสิ "เอเต ปราภเว โลเก"ติ.