[๑๑๙] คาเม วา ยทิ วารญฺเญติ คาโมปิ นิคโมปิ นครมฺปิ สพฺโพว อิธ คาโม สทฺธึ อุปจาเรน, ตํ ฐเปตฺวา เสสํ อรญฺญํ. ตสฺมึ คาเม วา ยทิ วารญฺเญ ยํ ปเรสํ มมายิตํ, ยํ ปรสตฺตานํ ปริคฺคหิตมปริจฺจตฺตํ สตฺโต วา สงฺขาโร วา. เถยฺยา อทินฺนํ อาทิยตีติ ๒- เตหิ อทินฺนํ อนนุญฺญาตํ เถยฺยจิตฺเตน อาทิยติ, เยน เกนจิ ปโยเคน เยน เกนจิ อวหาเรน อตฺตโน คหณํ สาเธติ.
[๑๒๐] อิณมาทายาติ อตฺตโน สนฺตกํ กิญฺจิ นิกฺขิปิตฺวา นิกฺเขปคฺคหเณน วา, กิญฺจิ อนิกฺขิปิตฺวา "เอตฺตเกน กาเลน เอตฺตกํ วฑฺฒึ ทสฺสามี"ติ วฑฺฒิคฺคหเณน วา, "ยํ อิโต อุทยํ ภวิสฺสติ, ตํ มยฺหํ มูลํ ตเวว ภวิสฺสตี"ติ วา "อุทยํ อุภินฺนมฺปิ สาธารณนฺ"ติ วา เอวํ ตํตํอาโยคคฺคหเณน ๓- วา อิณํ คเหตฺวา. ภุญฺชมาโน ๔- ปลายติ น หิ เต อิณมตฺถีติ เตน อิณายิเกน "เทหิ เม อิณนฺ"ติ โจทิยมาโน "น หิ เต อิณมตฺถิ, มยา คหิตนฺติ โก สกฺขี"ติ เอวํ ภณเนน ฆเร วสนฺโตปิ ปลายติ.
[๑๒๑] กิญฺจิกฺขกมฺยตาติ อปฺปมตฺตเกปิ กิสฺมิญฺจิเทว อิจฺฉาย. ปนฺถสฺมึ วชตํ ๔- ชนนฺติ มคฺเค คจฺฉนฺตํ ยํ กิญฺจิ อิตฺถึ วา ปุริสํ วา, หนฺตา ๕- กิญฺจิกฺขมาเทตีติ มาเรตฺวา โกฏฺเฏตฺวา วา ๖- ตํ ภณฺฑกํ คณฺหาติ.