@๖ ฉ.ม. เอวํ อสชฺชนานํ วจนํ ปพฺรูติ นีจํ กโรติ. มกาโร ปทสนฺธิกโร. นิหีโนติ คุณวุฑฺฒิโต ปริหีโน, อธมภาวํ วา คโต. เสน มาเนนาติ เตน อุกฺกํสนาวมฺภสงฺขาเตน ๑- อตฺตโน มาเนน.
[๑๓๓] โรสโกติ กายวาจาหิ ปเรสํ โรสชนโก. กทริโยติ ถทฺธมจฺฉรี, โย ปเร ปเรสํ เทนฺเต อญฺญํ วา ปุญฺญํ กโรนฺเต วาเรติ, ตสฺเสตํ อธิวจนํ. ปาปิจฺโฉติ อสนฺตคุณสมฺภาวนิจฺฉาย สมนฺนาคโต. มจฺฉรีติ อาวาสาทิมจฺฉริยยุตฺโต สโฐติ อสนฺตคุณปฺปกาสนลกฺขเณน สาเฐยฺเยน สมนฺนาคโต, อสมฺมาภาสี วา ๒- อกาตุกาโมปิ "กโรมี"ติอาทิวจเนน. นาสฺส ปาปชิคุจฺฉนลกฺขณา หิรี, นาสฺส อุตฺตาสนโต อุพฺเพคลกฺขณํ โอตฺตปฺปนฺติ อหิริโก อโนตฺตปฺปี.
[๑๓๔] พุทฺธนฺติ สมฺมาสมฺพุทฺธํ. ปริภาสตีติ. "อสพฺพญฺญู"ติอาทีหิ อุปวทติ, ๓- สาวกญฺจ "ทุปฺปฏิปนฺโน"ติอาทีหิ. ปริพฺพาชกํ ๔- คหฏฺฐํ วาติ สาวกวิเสสนเมว เจตํ ๕- ปพฺพชิตํ วา ตสฺส สาวกํ, คหฏฺฐํ วา ปจฺจยทายกนฺติ อตฺโถ. พาหิรกํ วา ปริพฺพาชกํ, ยํ กิญฺจิ วา คหฏฺฐํ อภูเตน โทเสน ปริภาสตีติ เอวเมตฺถ ๖- อตฺถํ อิจฺฉนฺติ โปราณา.
[๑๓๕] อนรหํ สนฺโตติ อขีณาสโว สมาโน. อรหํ ปฏิชานตีติ "อหํ อรหา"ติ ปฏิชานาติ, ยถา นํ "อรหา อยนฺ"ติ ชานนฺติ, ตถา วาจํ นิจฺฉาเรติ, กาเยน ปรกฺกมติ, จิตฺเตน อิจฺฉติ อธิวาเสติ. โจโรติ เถโน. สพฺรหฺมเก โลเกติ อุกฺกฏฺฐวเสน อาห, สพฺพโลเกติ วุตฺตํ โหติ. โลเก หิ สนฺธิจฺเฉทนนิลฺโลปหรณเอกาคาริกกรณปริปนฺถติฏฺฐนาทีนิ ๗- กตฺวา ๘- ปเรสํ ธนํ วิลุมฺปนฺตา โจราติ วุจฺจนฺติ, สาสเน ปน ปริสสมฺปตฺติอาทีหิ ปจฺจยาทีนิ วิลุมฺปนฺตา. ยถาห:-