ตเทว อนุพนฺธมานํ หตฺถิรตนํ อุปฺปชฺชติ, สพฺพเสโต รตฺตปาโท สตฺตปฺปติฏฺโฐ อิทฺธิมา เวหาสงฺคโม อุโปสถกุลา วา ฉทฺทนฺตกุลา วา อาคจฺฉติ, อุโปสถกุลา เจ อาคจฺฉนฺโต สพฺพเชฏฺฐโก อาคจฺฉติ, เจ ฉทฺทนฺตกุลา สพฺพกนิฏฺโฐ สิกฺขิตสิกฺโข ทมถูเปโต, โส ทฺวาทสโยชนํ ปริสํ คเหตฺวา สกลชมฺพูทีปํ อนุสํยายิตฺวา ปุเร ปาตราสเมว สกํ ราชธานึ อาคจฺฉติ.

ตมฺปิ อนุพนฺธมานํ อสฺสรตนํ อาคจฺฉติ, ๓- สพฺพเสโต รตฺตปาโท กากสีโส ๔- มุญฺชเกโส วลาหกสฺสราชกุลา อาคจฺฉติ. เสสเมตฺถ หตฺถิรตนสทิสเมว.

ตมฺปิ อนุพนฺธมานํ มณิรตนํ อุปฺปชฺชติ. โส โหติ มณิ เวฬุริโย สุโภ ชาติมา อฏฺฐํโส สุปริกมฺมกโต อายามโต ลคฺคนาภิสทิโส, ๕- เวปุลฺลปพฺพตา อาคจฺฉติ, โส จตุรงฺคสมนฺนาคเตปิ อนฺธกาเร รญฺโญ ธชคฺคโต โยชนํ โอภาเสติ, ยสฺโสภาเสน มนุสฺสา "ทิวา"ติ มญฺญมานา กมฺมนฺเต ปโยเชนฺติ, อนฺตมโส กุณฺฐกิปิลฺลิกมฺปิ อุปาทาย ปสฺสนฺติ.

ตมฺปิ อนุพนฺธมานํ อิตฺถีรตนํ อุปฺปชฺชติ, ปกติอคฺคมเหสี วา โหติ, อุตฺตรกุรุโต วา อาคจฺฉติ มทฺทราชกุลโต วา, อติทีฆาทิฉโทสวิวชฺชิตา ๖- อติกฺกนฺตา มานุสิกวณฺณํ ๗- อปฺปตฺตา ทิพฺพวณฺณํ, ยสฺสา รญฺโญ สีตกาเล