@๓ ฉ.ม. ทุทฺทสํ ๔ ฉ.ม. นาติมญฺเญยฺย

[๑๔๔] เอวํ ภควา สนฺตํ ปทํ อภิสเมจฺจ วิหริตุกามสฺส ตทธิคมาย วา ปฏิปชฺชมานสฺส วิเสสโต อารญฺญกสฺส ภิกฺขุโน เอกจฺจํ กรณียํ วตฺวา ปุน ตทุตฺตริมฺปิ ๑- วตฺตุกาโม "สนฺตุสฺสโก จา"ติ ทุติยํ คาถมาห.

ตตฺถ "สนฺตุฏฺฐี จ กตญฺญุตา"ติ เอตฺถ วุตฺตปฺปเภเทน ทฺวาทสวิเธน สนฺโตเสน สนฺตุสฺสตีติ สนฺตุสฺสโก. อถ วา ตุสฺสตีติ ตุสฺสโก, สเกน ตุสฺสโก, สนฺเตน ตุสฺสโก, สเมน ตุสฺสโกติ สนฺตุสฺสโก. ตตฺถ สกํ นาม "ปิณฺฑิยาโลปโภชนํ นิสฺสายา"ติ ๒- เอวํ อุปสมฺปทมณฺฑเล ๓- อุทฺทิฏฺฐํ อตฺตนาว ๔- สมฺปฏิจฺฉิตํ จตุปฺปจฺจยชาตํ, เตน สุนฺทเรน วา อสุนฺทเรน วา สกฺกจฺจํ วา อสกฺกจฺจํ วา ทินฺเนน ปฏิคฺคหณกาเล ปริโภคกาเล จ วิการํ อทสฺเสตฺวา ๕- ยาเปนฺโต "สเกน ตุสฺสโก"ติ วุจฺจติ. สนฺตํ นาม ยํ ลทฺธํ โหติ อตฺตโน วิชฺชมานํ, เตน สนฺเตเนว ตุสฺสนฺโต ตโต ปรํ อปตฺเถนฺโต ๖- อตฺริจฺฉตํ ปชหนฺโต "สนฺเตน ตุสฺสโก"ติ วุจฺจติ. สมํ นาม อิฏฺฐานิฏฺเฐสุ อนุนยปฏิฆปฺปหานํ, เตน สเมน สพฺพารมฺมเณสุ ตุสฺสนฺโต "สเมน ตุสฺสโก"ติ วุจฺจติ.