อถ อมฺหากํ โพธิสตฺโต ทีปงฺกรปาทมูเล กตปณิธาโน ยาว เวสฺสนฺตรชาตกํ, ตาว ปารมิโย ปูเรตฺวา ตุสิตภวเน อุปฺปชฺชิตฺวา ตตฺถ ยาวตายุกํ ฐตฺวา ธมฺมปทนิทาเน วุตฺตนเยเนว ๒- เทวตาหิ อภิยาจิโต ๓- ปญฺจ มหาวิโลกนานิ วิโลเกตฺวา เทวตานํ อาโรเจตฺวา ทฺวตฺตึสาย ปุพฺพนิมิตฺเตสุ วตฺตมาเนสุ อิธ ปฏิสนฺธึ อคฺคเหสิ ทสสหสฺสีโลกธาตุํ กมฺเปตฺวา, ตานิ ทิสฺวาปิ อิเม ราชยกฺขา "อิมินา การเณน นิพฺพตฺตานี"ติ น ชานึสุ. "ขิฑฺฑาปสุตตฺตา เนวทฺทสํสู"ติ เอเก. เอส นโย ชาติยํ อภินิกฺขมเน โพธิยญฺจ. ธมฺมจกฺกปฺปวตฺตเน ปน ปญฺจวคฺคิเย อามนฺเตตฺวา ภควติ ติปริวฏฺฏํ ทฺวาทสาการํ วรธมฺมจกฺกํ ปวตฺเตนฺเต มหาภูมิจาลํ ปุพฺพนิมิตฺตํ ปาฏิหาริยานิ จ เอเตสํ เอโก สาตาคิโรเยว ปฐมํ อทฺทส. นิพฺพตฺติการณญฺจ เตสํ ญตฺวา สปริโส ภควนฺตํ อุปสงฺกมฺม เทสนํ ๔- อสฺโสสิ, น จ กิญฺจิ วิเสสํ อธิคจฺฉิ. กสฺมา? โส หิ ธมฺมํ สุณนฺโต เหมวตํ อนุสฺสริตฺวา "อาคโต นุ โข เม สหายโก, โน"ติ ปริสํ โอโลเกตฺวา ตํ อปสฺสนฺโต "วญฺจิโต ๕- เม สหาโย, โย เอวํ วิจิตฺรปฏิภานํ ภควโต ธมฺมเทสนํ น สุณาตี"ติ วิกฺขิตฺตจิตฺโต อโหสิ. ภควา จ อตฺถงฺคเตปิ สูริเย เทสนํ น นิฏฺฐาเปสิ.

@๒ ฉ.ม. วุตฺตนเยน ๓ ฉ.ม. อายาจิโต

@๔ ฉ.ม. ธมฺมเทสนํ ๕ ม. ปปญฺจิโต