ภควาปิ คนฺธกุฏิโต นิกฺขมฺม ปญฺญตฺตาสเน นิสีทิ, ตาปโสปิ โข ปตฺตสาขํ ๑- ปจิตฺวา ขาทิตฺวา ภควโต สนฺติเก นิสีทิ. กึกิ กาสิกราชา ภิกฺขู ปิณฺฑาย จรนฺเต ทิสฺวา "กุหึ ภควา ภนฺเต"ติ ปุจฺฉิตฺวา "วิหาเร มหาราชา"ติ จ สุตฺวา นานาพฺยญฺชนรสมเนกมํสวิกติสมฺปนฺนํ โภชนํ ภควโต ปาเหสิ. อมจฺจา วิหารํ เนตฺวา ภควโต อาโรเจตฺวา ทกฺขิโณทกํ ทตฺวา ปริวิสนฺตา ปฐมํ นานามํสวิกติสมฺปนฺนํ ยาคุ อทํสุ. ตาปโส ทิสฺวา "ขาทติ นุ โข โน"ติ จินฺเตนฺโต อฏฺฐาสิ. ภควา ตสฺส ปสฺสโตเยว ยาคุํ ปิวนฺโต มํสขณฺฑํ มุเข ปกฺขิปิ, ตาปโส ทิสฺวา กุทฺโธ. ปุน ยาคุปีตสฺส นานารสพฺยญฺชนโภชนมทํสุ, ตมฺปิ คเหตฺวา ภุญฺชนฺตํ ทิสฺวา อติวิย กุทฺโธ "มจฺฉมํสํ ขาทนฺโตเยว `น ขาทามี'ติ ภณตี"ติ. อถ ภควนฺตํ กตภตฺตกิจฺจํ หตฺถปาเท โธวิตฺวา นิสินฺนํ อุปสงฺกมฺม "โภ กสฺสป มุสา ตฺวํ ภณสิ, เนตํ ปณฺฑิตกิจฺจํ. มุสาวาโท หิ ครหิโต พุทฺธานํ, เยปิ เต ปพฺพตปาเท วนมูลผลาทีหิ ยาเปตฺวา ๒- อิสโย วสนฺติ, เตปิ มุสา น ภณนฺตี"ติ วตฺวา ปุน อิสีนํ คุเณ คาถาย วณฺเณนฺโต อาห "สามากจิงฺคูลกจีนกานิ จา"ติ.