อริยสจฺจาน ทสฺสนํ นาม กุมารปเญฺห วุตฺตตฺถานํ จตุนฺนํ อริยสจฺจานํ อภิสมยวเสน มคฺคทสฺสนํ. ตํ สํสารทุกฺขวีติกฺกมเหตุโต "มงฺคลนฺ"ติ วุจฺจติ.

นิพฺพานสจฺฉิกิริยา นาม อิธ อรหตฺตผลํ "นิพฺพานนฺ"ติ อธิปฺเปตํ. ตมฺปิ หิ ปญฺจคติวานเนน ๔- วานสญฺญิตาย ตณฺหาย นิกฺขนฺตตฺตา "นิพฺพานนฺ"ติ วุจฺจติ. ตสฺส ปตฺติ วา ปจฺจเวกฺขณา วา "สจฺฉิกิริยา"ติ วุจฺจติ. อิตรสฺส ปน นิพฺพานสฺส อริยสจฺจานํ ทสฺสเนเนว สจฺฉิกิริยา สิทฺธา, เตเนตํ อิธ น อธิปฺเปตํ. เอวเมสา นิพฺพานสจฺฉิกิริยา ทิฏฺฐธมฺมสุขวิหารเหตุโต "มงฺคลนฺ"ติ เวทิตพฺพา.

เอวมิมิสฺสา คาถาย ตโป จ, พฺรหฺมจริยญฺจ, อริยสจฺจาน ทสฺสนํ, นิพฺพานสจฺฉิกิริยาติ จตฺตาริ มงฺคลานิ วุตฺตานิ, มงฺคลตฺตญฺจ เนสํ ตตฺถ ตตฺถ วิภาวิตเมวาติ.