[๑๕] เอวํ ภควา ปริยตฺติธมฺมญฺจ นวโลกุตฺตรธมฺมญฺจ นิสฺสาย ทฺวีหิ คาถาหิ พุทฺธาธิฏฺฐานํ สจฺจํ วตฺวา อิทานิ เย ตํ ปริยตฺติธมฺมํ อสฺโสสุํ, สุตฺตานุสาเรเนว ๔- ปฏิปชฺชิตฺวา นวปฺปการมฺปิ โลกุตฺตรธมฺมํ อธิคมึสุ, เตสํ อนุปาทิเสสนิพฺพานปฺปตฺติคุณํ นิสฺสาย ปุน สํฆาธิฏฺฐานํ สจฺจํ วตฺตุมารทฺโธ "ขีณํ ปุราณนฺ"ติ. ตตฺถ ขีณนฺติ ปริกฺขีณํ สมุจฺฉินฺนํ วา. ๕- ปุราณนฺติ ปุราตนํ. นวนฺติ สมฺปตฺติ ๖- วตฺตมานํ. นตฺถิ สมฺภวนฺติ อวิชฺชมานปาตุภาวํ. วิรตฺตจิตฺตาติ วีตราคจิตฺตา. อายติเก ภวสฺมินฺติ อนาคตมทฺธานํ ปุนพฺภเว. เตติ เยสํ ขีณํ ปุราณํ นวํ นตฺถิ สมฺภวํ, เย จ อายติเก ภวสฺมึ วิรตฺตจิตฺตา, เต ขีณาสวา ภิกฺขู เอว. ๗- ขีณพีชาติ อุจฺฉินฺนพีชา. อวิรุฬฺหิฉนฺทาติ วิรุฬฺหิยา ฉนฺทวิรหิตา. นิพฺพนฺตีติ วิชฺฌายนฺติ. ธีราติ ธิติสมฺปนฺนา. ยถายมฺปทีโปติ อยํ ปทีโป วิย.

@๔ ฉ.ม. สุตานุสาเรน จ ๕ ฉ.ม. ขีณนฺติ สมุจฺฉินฺนํ. ๖ ฉ.ม. สมฺปติ

@๗ ฉ.ม. เอว-สทฺโท น ทิสฺสติ