[๓๙๖] เอวํ ขีณาสวปฏิปตฺตึ ทสฺเสนฺโต อรหตฺตนิกูเฏน อนคาริยปฏิปทํ นิฏฺฐาเปตฺวา ๑- อิทานิ อคาริยปฏิปทํ ทสฺเสตุํ "คหฏฺฐวตฺตํ ปน โว"ติอาทิมาห. ตตฺถ ปฐมคาถาย ตาว สาวโกติ อคาริยสาวโก, เสสํ อุตฺตานตฺถเมว. อยํ ปน โยชนา:- โย มยา อิโต ปุพฺเพ เกวโล อพฺยามิสฺโส สกโล ปริปุณฺโณ ภิกฺขุธมฺโม กถิโต, เอส เขตฺตวตฺถุอาทิปริคฺคเหหิ สปริคฺคเหน น ลพฺภา ผสฺเสตุํ น สกฺกา อธิคนฺตุนฺติ.
[๓๙๗] เอวํ ตสฺส ภิกฺขุธมฺมํ ปฏิเสเธตฺวา คหฏฺฐธมฺมเมว ทสฺเสนฺโต อาห "ปาณํ น หเน"ติ. ตตฺถ ปุริมฑฺเฒน ๒- ติโกฏิปริสุทฺธา ปาณาติปาตา เวรมณิ วุตฺตา ปจฺฉิมฑฺเฒน สตฺเตสุ หิตปฏิปตฺติ. ตติยปาโท เจตฺถ ขคฺควิสาณสุตฺเต ๓- จตุตฺถปาเท ถาวรตสเภโท เมตฺตสุตฺตวณฺณนายํ ๔- สพฺพปฺปการโต วณฺณิโต. เสสํ อุตฺตานตฺถเมว. อุปฺปฏิปาฏิยา ปน โยชนา กาตพฺพา:- ตสถาวเรสุ สพฺเพสุ ภูเตสุ นิธาย ทณฺฑํ น หเน น ฆาตเยยฺย นานุชญฺญาติ. "นิธาย ทณฺฑนฺ"ติ อิโต วา ปรํ "วตฺเตยฺยา"ติ ปาฐเสโส อาหริตพฺโพ. อิตรถา หิ น ปุพฺเพนาปรํ สนฺธิยตีติ.
[๓๙๘] เอวํ ปฐมสิกฺขาปทํ ทสฺเสตฺวา อิทานิ ทุติยสิกฺขาปทํ ทสฺเสนฺโต อาห "ตโต อทินฺนนฺ"ติ ตตฺถ กิญฺจีติ อปฺปํ วา พหุํ วา. กฺวจีติ คาเม วา อรญฺเญ วา. สาวโกติ อคาริยสาวโก. พุชฺฌมาโนติ "ปรสนฺตกมิทนฺ"ติ ชานมาโน. สพฺพํ อทินฺนํ ปริวชฺชเยยฺยาติ เอวํ หิ ปริวชฺชมาโน ๕- สพฺพํ อทินฺนํ ปริวชฺชเยยฺย, โน อญฺญถาติ ทีเปติ. เสสเมตฺถ วุตฺตนยญฺจ ปากฏญฺจาติ.