@๖ ฉ.ม. อฏฺฐปุริสมลวิคมา พาหิรมลาภาเวน วิมลตฺตา อกาโจ. สมโล หิ "สกาโจ"ติ วุจฺจติ. วิมลตฺตา วา อาคุํ น กโรติ, เตน อกาโจ. อาคุกิริยา หิ อุปฆาตกรณโต "กาโจ"ติ วุจฺจติ.
[๔๘๒] อตฺตนา ๑- อตฺตานํ นานุปสฺสตีติ ญาณสมฺปยุตฺเตน จิตฺเตน วิปสฺสนฺโต อตฺตโน ขนฺเธสุ อญฺญํ อตฺตานํ นาม น ปสฺสติ, ขนฺธมตฺตเมว ปสฺสติ. ยา จายํ "อตฺตนาว อตฺตานํ สญฺชานามี"ติ ตสฺส สจฺจโต ตถโต ๒- ทิฏฺฐิ อุปฺปชฺชติ, ตสฺมา, อภาวา อตฺตโน อตฺตานํ น ปสฺสติ, ๓- อญฺญทตฺถุ ปญฺญาย ขนฺเธ ปสฺสติ. มคฺคสมาธินา สมาหิโต, กายวงฺกาทีนํ อภาวา อุชฺชุคโต, โลกธมฺเมหิ อกมฺปนียโต ฐิตตฺโต, ตณฺหาสงฺขาตาย เอชาย ปญฺจนฺนํ เจโตขิลานญฺจ อฏฺฐฏฺฐานาย กงฺขาย จ อภาวา อเนโช อขิโล อกงฺโข.
[๔๘๓] โมหนฺตราติ โมหการณา โมหปจฺจยา, สพฺพกิเลสานเมตํ อธิวจนํ. สพฺเพสุ ธมฺเมสุ จ ญาณทสฺสีติ สจฺฉิกตสพฺพญฺญุตญฺญาโณ. ตญฺหิ สพฺเพสุ ธมฺเมสุ ญาณํ, ตญฺจ ภควา ปสฺสิ, "อธิคตํ เม"ติ สจฺฉิกตฺวา วิหาสิ. เตน วุจฺจติ "สพฺเพสุ ธมฺเมสุ จ ญาณทสฺสี"ติ. สมฺโพธินฺติ อรหตฺตํ. อนุตฺตรนฺติ ปจฺเจกพุทฺธสาวเกหิ อสาธารณํ. สิวนฺติ เขมํ นิรุปทฺทวํ, สสฺสิริกํ วาติ. ๔- ยกฺขสฺสาติ ปุริสสฺส. สุทฺธีติ โวทานตา. เอตฺถ หิ โมหนฺตราภาเวน สพฺพโทสาภาโว, เตน สํวรการณสมุจฺเฉโท ๕- อนฺติมสรีรธาริตา, ญาณทสฺสิตาย สพฺพคุณสมฺภโว, เตน อนุตฺตรา สมฺโพธิปตฺติ ๖- อิโต ปรํ ๗- ปหาตพฺพํ อธิคนฺตพฺพํ วา นตฺถิ. เตนาห "เอตฺตาวตา ยกฺขสฺส สุทฺธี"ติ.
[๔๘๔] เอวํ วุตฺเต พฺราหฺมโณ ภิยฺโยโส มตฺตาย ภควติ ปสนฺโน ปสนฺนาการํ กโรนฺโต อาห "หุตญฺจ มยฺหนฺ"ติ. ตสฺสตฺโถ:- ยมหํ อิโต ปุพฺเพ