[๕๘๓-๖] กิญฺจ ภิยฺโย:- "ยถาปิ กุมฺภการสฺส ฯเปฯ ชีวิตนฺติ. ตสฺมา "ทหรา จ ฯเปฯ ปรายนา"ติ เอวํ คณฺห, เอวญฺจ คเหตฺวา "เตสํ มจฺจุ ฯเปฯ ญาตี วา ปน ญาตเก"ติ เอวมฺปิ คณฺห. ยสฺมา จ น ปิตา ตายเต ปุตฺตํ, ญาตี วา ปน ญาตเก, ตสฺมา เปกฺขตํเยว ฯเปฯ นิยฺยติ.

ตตฺถ อยํ โยชนา:- ปสฺสมานานํเยว ญาตีนํ "อมฺม ตาตา"ติอาทินา นเยน ปุถุ อเนกปฺปการกํ ลาลปตํเยว มจฺจานํ เอกเมโก มจฺโจ ยถา โค วชฺโฌ เอวํ นิยฺยติ, เอวํ ปสฺส อุปาสก ยาว อตาโณ โลโกติ.

[๕๘๗] ตตฺถ เย พุทฺธปจฺเจกพุทฺธาทโย ธิติสมฺปนฺนา, เต "เอวมพฺภาหโต โลโก มจฺจุนา จ ชราย จ, โส น สกฺกา เกนจิ ปริตฺตาณํ กาตุนฺ"ติ ๑- ยสฺมา ชานนฺติ, ตสฺมา ธีรา น โสจนฺติ วิทิตฺวา โลกปริยายํ, อิมํ โลกสภาวํ ญตฺวา น โสจนฺตีติ วุตฺตํ โหติ.