[๖๗๘] ปุฬวาวสเถติ ปุฬวานํ อาวาเส. อยมฺปิ โลหกุมฺภีเยว เทวทูเต "คูถนิรโย"ติ วุตฺตา, ตตฺถ ปติตสฺส สูจิมุขปาณา ฉวิอาทีนิ ฉินฺทิตฺวา อฏฺฐิมิญฺชํ ขาทนฺติ. คนฺตุํ น หิ ตีรมปตฺถีติ อวคนฺตุํ ๑- น หิ ตีรมตฺถิ. "ตีรวมตฺถี"ติปิ ปาโฐ, โสเยวตฺโถ. ตีรเมว เอตฺถ "ตีรวนฺ"ติ วุตฺตํ. สพฺพสฺมา หิ สมนฺตกปลฺลาติ ยสฺมา ตสฺสา กุมฺภิยา อุปริภาเคปิ นิกุชฺชิตตฺตา สพฺพตฺถ สมา สมนฺตโต กฏาหา, ตสฺมา อวคนฺตุํ ๑- ตีรํ นตฺถีติ วุตฺตํ โหติ.

[๖๗๙] อสิปตฺตวนํ เทวทูเต วุตฺตนยเมว. ตํ หิ ทูรโต รมณียํ อมฺพวนํ วิย ทิสฺสติ, อเถตฺถ โลเภน เนรยิกา ปวิสนฺติ, ตโต เนสํ วาเตริตานิ ปตฺตานิ ปติตฺวา องฺคปจฺจงฺคานิ ฉินฺทนฺติ. เตนาห "ตํ ปวิสนฺติ สมุจฺฉินฺนคตฺตา"ติ. ๒- ตํ ปวิสนฺติ ตโต สุฏฺฐุ ฉินฺนคตฺตา โหนฺตีติ. ชิวฺหํ พฬิเสน คเหตฺวา อารจยารจยา ๓- วิหนนฺตีติ ตตฺถ อสิปตฺตวเน เวเคน วิธาวิตฺวา ๔- ปติตานํ มุสาวาทีนํ เนรยิกานํ นิรยปาลา ชิวฺหํ พฬิเสน นิกฺกฑฺฒิตฺวา ยถา มนุสฺสา อลฺลจมฺมํ ภูมิยํ ปตฺถริตฺวา ขิเลหิ อาโกเฏนฺติ, เอวํ อาโกเฏตฺวา ผรสูหิ ผาเลตฺวา ผาเลตฺวา เอกเมกํ โกฏึ ฉินฺทนฺตา ๕- วิหนนฺติ, ฉินฺนฉินฺนา โกฏิ ปุนปฺปุนํ สมุฏฺฐาติ. "อารชยารชยา"ติปิ ปาโฐ, อาวิญฺฉิตฺวา อาวิญฺฉิตฺวาติ ๖- อตฺโถ. เอตมฺปิ เทวทูเต อวุตฺตกมฺมกรณํ.

[๖๘๐] เวตฺตรณินฺติ เทวทูเต "มหตี ขาโรทกา นที"ติ วุตฺตนทึ. สา กิร คงฺคา วิย อุทกภริตา ทิสฺสติ, อเถตฺถ นฺหายิสฺสาม ปิวิสฺสามาติ เนรยิกา ปตนฺติ. ติณฺหธารํ ขุรธารนฺติ ๗- ติณฺหผารํ ขุรผารํ, ติกฺขธารขุรธารวตินฺติ ๘- วุตฺตํ โหติ. ตสฺสา กิร นทิยา อุทฺธมโธ อุภยตีเรสุ จ ติณฺหธารา