[๘๔๔] อิโต ปรา เทฺว คาถา วิสฺสชฺชนปุจฺฉานเยน ปวตฺตตฺตา ปากฏสมฺพนฺธาเยว. ตาสุ ปฐมคาถาย สงฺเขปตฺโถ:- ตสฺส มยฺหํ มาคนฺทิย ทฺวาสฏฺฐิทิฏฺฐิคตธมฺเมสุ วินิจฺฉินิตฺวา "อิทเมว สจฺจํ โมฆมญฺญนฺ"ติ เอวํ อิทํ วทามีติ สมุคฺคหิตํ น โหติ นตฺถิ น วิชฺชติ. กึการณา? อหญฺหิ ปสฺสนฺโต ทิฏฺฐีสุ อาทีนวํ กญฺจิ ทิฏฺฐึ อคฺคเหตฺวา สจฺจานิ จ วิจินนฺโต อชฺฌตฺตํ ๓- ราคาทีนํ สนฺติภาเวน อชฺฌตฺตสนฺติสงฺขาตํ นิพฺพานเมว อทฺทสนฺติ.

[๘๔๕] ทุติยคาถาย สงฺเขปตฺโถ:- ยานิมานิ ทิฏฺฐิคตานิ เตหิ เตหิ สตฺเตหิ วินิจฺฉินิตฺวา คหิตตฺตา วินิจฺฉยาติ จ อตฺตโน ปจฺจเยหิ อภิสงฺขตภาวาทินา นเยน ปกปฺปิตานิ จาติ วุจฺจนฺติ, เต ตฺวํ มุนี ทิฏฺฐิคตธมฺเม อคฺคเหตฺวา อชฺฌตฺตสนฺตีติ ยเมตมตฺถํ พฺรูสิ, อาจิกฺข เม, กถํ นุ ธีเรหิ ปเวทิตํ กถํ ๔- ปกาสิตํ ธีเรหิ ตํ ปทนฺติ. ๕-

@๓ สี.,ก. อชฺฌตฺตานํ ๔ ก. ปเวทิตนฺตํ ๕ ก. วทาตํ