น สพฺโพ สพฺพทาเยว ตสฺส ตํ อุปกปฺปตี"ติ.

ตสฺสตฺโถ:- โส นิธิปิ ตาว สุนิหิโต สนฺโต, ตาว สุฏฺฐุ นิขณิตฺวา ฐปิโตปิ ๑- สมาโนติ วุตฺตํ โหติ. ๒- กีวสุฏฺฐูติ,? คมฺภีเร โอทกนฺติเกต, ยาว คมฺภีเร โอทกนฺติเก สุนิหิโตติ ๓- สงฺขยํ ๔- คจฺฉติ, ตาว สุฏฺฐูติ วุตฺตํ โหติ. น สพฺโพ สพฺพทาเยว, ตสฺส ตํ อุปกปฺปตีติ เยน ปุริเสน นิหิโต, ตสฺส สพฺโพปิ สพฺพกาลํ น อุปกปฺปติ น สมฺปชฺชติ, ยถาวุตฺตกิจฺจกรณสมตฺโถ น โหตีติ วุตฺตํ โหติ. กินฺตุ โกจิเทว กทาจิเทว อุปกปฺปติ, เนว วา อุปกปฺปตีติ. เอตฺถ จ ตนฺติ ปทปูรณมตฺเต นิปาโต ทฏฺฐพฺโพ "ยถา ตํ อปฺปมตฺตสฺส อาตาปิโน"ติ เอวมาทีสุ ๕- วิย. ลิงฺคเภทํ วา กตฺวา "โส"ติ วตฺตพฺเพ "ตนฺ"ติ วุตฺตํ. เอวญฺหิ วุจฺจมาเน โส อตฺโถ สุขํ พุชฺฌตีติ.

จตุตฺถปญฺจมคาถาวณฺณนา

เอวํ "น สพฺโพ สพฺพทาเยว, ตสฺส ตํ อุปกปฺปตี"ติ วตฺวา อิทานิ เยหิ การเณหิ น อุปกปฺปติ, ตานิ ทสฺเสนฺโต อาห:-