@๔ ที. ปาฏิ. ๑๑/๒๓๖/๑๕๐ ๕-๕ ฉ.ม. สมจิต..., สี.,อิ. สมุปจิต...

@๖ ที. ปาฏิ. ๑๑/๒๒๔/๑๔๒ ลกฺขณสุตฺต

อิมินา นเยน อิโต ปเรสุปิ อิมินา ปุญฺญนิธินา ปฏิลาภสาธกานิ สุตฺตปทานิ ตโต ตโต อาเนตฺวา วตฺตพฺพานิ. อติวิตฺถารภเยน ตุ อิทานิ อวตฺวาว เสสปทานํ ๑- วณฺณนํ กริสฺสามิ.

สุรูปตาติ เอตฺถ สกลสรีรํ รูปนฺติ เวทิตพฺพํ "อากาโส ปริวาริโต รูปนฺเตฺว สงฺขฺยํ คจฺฉตีติ อาทีสุ วิย, ตสฺส รูปสฺส สุนฺทรตา สุรูปตา นาติทีฆตา นาติรสฺสตา นาติกีสตา นาติถูลตา นาติกาฬตา นจฺโจทาตตาติ วุตฺตํ โหติ. อาธิปจฺจนฺติ อธิปติภาโว, ขตฺติยมหาสาลาทิภาเวน สามิกภาโวติ อตฺโถ. ปริวาโรติ อาคาริกานํ สชนปริชนสมฺปตฺติ, อนาคาริกานํ ปริสสมฺปตฺติ, อาธิปจฺจญฺจ ปริวาโร จ อาธิปจฺจปริวาโร. เอตฺถ จ สุวณฺณตาทีหิ สรีรสมฺปตฺติ, อาธิปจฺเจน โภคสมฺปตฺติ, ปริวาเรน สชนปริชนสมฺปตฺติ วุตฺตาติ เวทิตพฺพา. สพฺพเมเตน ลพฺภตีติ ยนฺตํ "ยํ ยํ เทวาภิปตฺเถนฺติ, สพฺพเมเตน ลพฺภตี"ติ วุตฺตํ, ตตฺถ อิทมฺปิ ตาว ปฐมํ โอธิโส วุตฺตํ สุวณฺณตาทิ สพฺพเมเตน ลพฺภตีติ เวทิตพฺพนฺติ ทสฺเสติ.