สยมาโน น คจฺฉามิ; นตฺถิ พาเล สหายตา.

หนฺทาหํ หตจกฺขุสฺมิ กนฺตารทฺธานมาคโต

มริสฺสามิ, โน คมิสฺสามิ; นตฺถิ พาเล สหายตาติ. ตํ สุตฺวา อิตโร สํเวคชาโต, "ภาริยํ วต เม สาหสิกํ อนนุจฺฉวิกํ กมฺมํ กตนฺติ พาหา ปคฺคยฺห กนฺทนฺโต วนสณฺฑํ ปกฺขนฺทิตฺวา ตถา ปกฺกนฺโตว อโหสิ.

เถรสฺสาปิ สีลเตเชน สฏฺฐิโยชนายามํ ปณฺณาสโยชนวิตฺถตํ ปณฺณรสโยชนพหลํ ชยสุมนปุปฺผวณฺณํ นิสีทนุฏฺฐหนกาเลสุ โอนมนุนฺนมนปกติกํ สกฺกสฺส เทวราชสฺส ปณฺฑุกมฺพลสิลาสนํ อุณฺหาการํ ทสฺเสสิ. สกฺโก "โก นุ โข มํ ฐานา จาเวตุกาโมติ โอโลเกนฺโต ทิพฺเพน จกฺขุนา เถรํ อทฺทส.