`ธมฺมครุโก อยํ ปาโล นิสินฺโน สาสเน รโตติ.

อถสฺส เอตทโหสิ "สจาหํ เอวรูปสฺส ปาปครหิโน ธมฺมครุกสฺส อยฺยสฺส สนฺติกํ น คมิสฺสามิ, มุทฺธา เม สตฺตธา ผเลยฺย; คมิสฺสามิสฺส สนฺติกนฺติ. ตโต

สหสฺสเนตฺโต เทวินฺโท เทวรชฺชสิรีธโร

ตํขเณน อาคนฺตฺวา, จกฺขุปาลํ อุปาคมิ. อุปคนฺตฺวา จ ปน เถรสฺสาวิทูเร ปทสทฺทํ อกาสิ. อถ นํ เถโร ปุจฺฉิ "โก เอโสติ. "อหํ ภนฺเต อทฺธิโกติ. "กุหึ ยาสิ อุปาสกาติ. "สาวตฺถิยํ ภนฺเตติ. "ยาหิ อาวุโสติ. "อยฺโย ปน ภนฺเต กุหึ คมิสฺสตีติ. "อหํปิ ตตฺเถว คมิสฺสามีติ. "เตนหิ เอกโตว คจฺฉาม ภนฺเตติ. "อหํ ทุพฺพโล, มยา สทฺธึ คจฺฉนฺตสฺส ตว ปปญฺโจ ภวิสฺสตีติ. "มยฺหํ อจฺจายิกํ นตฺถิ; อหํปิ อยฺเยน สทฺธึ คจฺฉนฺโต ทสสุ ปุญฺญกิริยาวตฺถูสุ เอกํ ลภิสฺสามิ; เอกโตว คจฺฉาม ภนฺเตติ. เถโร "เอโส สปฺปุริโส ภวิสฺสตีติ จินฺเตตฺวา "เตนหิ ยฏฺฐิโกฏึ คณฺห อุปาสกาติ อาห. สกฺโก ตถา กตฺวา ปฐวึ สงฺขิปนฺโต สายณฺหสมเย เชตวนํ สมฺปาเปสิ. เถโร สงฺขปณวาทิสทฺเท สุตฺวา "กตฺเถโส สทฺโทติ ปุจฺฉิ. "สาวตฺถิยํ ภนฺเตติ. "มยํ คมนกาเล จิเรน คมิมฺหาติ. "อหํ อุชุกมคฺคํ ชานามิ ภนฺเตติ. ตสฺมึ ขเณ เถโร "นายํ มนุสฺโส, เทวตา ภวิสฺสตีติ สลฺลกฺเขสิ.