กิริยาวิเสโสติ อิเม ฉ อาณตฺตี นิยามตา"ติ. ๒-

ตตฺถ วตฺถูติ มาเรตพฺโพ ปาโณ. กาโลติ ปุพฺพณฺหสายณฺหาทิกาโล โยพฺพนถามวิริยาทิกาโล จ. โอกาโสติ คาโม วา นิคโม วา วนํ วา รจฺฉา วา สิฆาฏกํ วาติ เอวมาทิ. อาวุธนฺติ อสิ วา ผรสุ ๓- วา ๓- อุสุ วา สตฺติ วาติ เอวมาทิ. อิริยาปโถติ มาเรตพฺพสฺส มารกสฺส จ ฐานํ วา นิสฺสชฺชา วาติ เอวมาทิ.

กิริยาวิเสโสติ วิชฺฌนํ วา เฉทนํ วา เภทนํ วา สงฺขมุณฺฑิกํ วาติ เอวมาทิ. ยทิ หิ วตฺถุํ วิสํวาเทตฺวา "ยํ มาเรหี"ติ อาณตฺโต, ตโต อญฺญํ มาเรติ, อาณาปกสฺส นตฺถิ กมฺมพนฺโธ. อถ วตฺถุํ อวิสํวาเทตฺวา มาเรติ, อาณาปกสฺส อาณตฺติกฺขเณ อาณตฺตสฺส มรณกฺขเณติ อุภเยสมฺปิ กมฺมพนฺโธ. เอส นโย กาลาทีสุปิ.

มารณตฺถนฺตุ กาเยน วา กายปฏิพทฺเธน วา ปหรณนิสฺสชฺชนํ นิสฺสคฺคิโก ปโยโค, โสปิ อุทฺทิสฺสานุทฺทิสฺสเภทโต ทุพฺพิโธ เอว, กมฺมพนฺโธ เจตฺถ ปุพฺเพ วุตฺตนเยเนว เวทิตพฺโพ.