โส กิรายสฺมา ภควโต ปิตุจฺฉาปุตฺโต มหลฺลกกาเล ปพฺพชิโต พุทฺธสาสเน อุปฺปนฺนํ ลาภสกฺการํ ปริภุญฺชนฺโต ถุลฺลสรีโร อาโกฏิตปจฺจาโกฏิเตหิ จีวเรหิ เยภุยฺเยน วิหารมชฺเฌ อุปฏฺฐานสาลายํ นิสีทติ. ตถาคตสฺส ทสฺสนตฺถาย อาคตา อาคนฺตุกา ภิกฺขู "เอโส มหาเถโร ภวิสฺสตีติ สญฺญาย ตสฺส สนฺติกํ คนฺตฺวา วตฺตํ อาปุจฺฉนฺติ, ปาทสมฺพาหนาทีนิ อาปุจฺฉนฺติ. โส ตุณฺหี โหติ. อถ นํ เอโก ทหรภิกฺขุ "กติวสฺสา ตุมฺเหติ ปุจฺฉิตฺวา "วสฺสํ นตฺถิ, มหลฺลกกาเล ปพฺพชิตา มยนฺติ วุตฺเต, "อาวุโส ทุพฺพินีต มหลฺลก อตฺตโน ปมาณํ น ชานาสิ, เอตฺตเก มหลฺลกตฺเถเร ทิสฺวา สามีจิมตฺตํปิ น กโรสิ, วตฺเต อาปุจฺฉิยมาเน, ตุณฺหี โหสิ, กุกฺกุจฺจมตฺตํปิ เต นตฺถีติ อจฺฉรํ ปหริ. โส ขตฺติยมานํ ชเนตฺวา "ตุมฺเห กสฺส สนฺติกํ อาคตาติ ปุจฺฉิตฺวา, "สตฺถุ สนฺติกนฺติ วุตฺเต, "มํ ปน `โก เอโสติ สลฺลกฺเขถ, มูลเมว โว ฉินฺทิสฺสามีติ วตฺวา รุทนฺโต ทุกฺขี ทุมฺมโน สตฺถุ สนฺติกํ อคมาสิ. อถ นํ สตฺถา "กินฺนุ ตฺวํ ติสฺส ทุกฺขี ทุมฺมโน อสฺสุมุโข รุทมาโน อาคโตสีติ ปุจฺฉิ. เตปิ ภิกฺขู "เอส คนฺตฺวา กิญฺจิ อาลุลิกํ กเรยฺยาติ จินฺเตตฺวา เตเนว สทฺธึ คนฺตฺวา สตฺถารํ วนฺทิตฺวา เอกมนฺตํ นิสีทึสุ. โส สตฺถารา ปุจฺฉิโต "อิเม มํ ภนฺเต ภิกฺขู อกฺโกสนฺตีติ อาห. "กหํ ปน ตฺวํ นิสินฺโนสีติ. "วิหารมชฺเฌ อุปฏฺฐานสาลายํ ภนฺเตติ. "อิเม เต ภิกฺขู อาคจฺฉนฺตา ทิฏฺฐาติ. "ทิฏฺฐา ภนฺเตติ. "อุฏฺฐาย เต ปจฺจุคฺคมนํ กตนฺติ. "น กตํ ภนฺเตติ. "เตสํ ปริกฺขารคฺคหณํ เต อาปุจฺฉิตนฺติ. "นาปุจฺฉิตํ ภนฺเตติ. "วตฺตํ วา ปานียํ วา อาปุจฺฉิตนฺติ. "นาปุจฺฉิตํ ภนฺเตติ. "อาสนํ อภิหริตฺวา ปาทสมฺพาหนํ กตนฺติ. "น กตํ ภนฺเตติ. "ติสฺส มหลฺลกภิกฺขูนํ สพฺพเมตํ วตฺตํ กตฺตพฺพํ, เอตํ อกโรนฺเตน วิหารมชฺเฌ นิสีทิตุํ น วฏฺฏติ; ตเวว โทโส, เอเต ภิกฺขู ขมาเปหีติ. "เอเต มํ ภนฺเต อกฺโกสึสุ, นาหํ เอเต ขมาเปมีติ. "ติสฺส มา เอวํ กริ: ตเวว โทโส, ขมาเปหิ เนติ. "น ขมาเปมิ ภนฺเตติ. อถ สตฺถา "ทุพฺพโจ เอส ภนฺเตติ ภิกฺขูหิ วุตฺเต, "น ภิกฺขเว อิทาเนว, ปุพฺเพเปส ทุพฺพโจเยวาติ วตฺวา "อิทานิ ตาวสฺส ภนฺเต ทุพฺพจภาโว อมฺเหหิ ญาโต, อตีเต กิมกาลีติ วุตฺเต, "เตนหิ ภิกฺขเว สุณาถาติ วตฺวา อตีตํ อาหริ: