อารภิตฺวาน อมตํ ชหนฺโต สพฺพปาปเก

นิทสฺสนญฺเจตฺถ ภเว มคฺคฏฺโฐ อริยปุคฺคโลติ. เอวเมตฺถ วิรมโตปิ วิญฺญาตพฺโพ วินิจฺฉโย.

ผลโตติ สพฺเพว เจเต ปาณาติปาตาทโย ทุคฺคติยํ ผลนิพฺพตฺตกา โหนฺติ, สุคติยญฺจ อนิฏฺฐากนฺตามนาปวิปากนิพฺพตฺตกา สมฺปราเย ทิฏฺฐธมฺเม เอว จ อเวสารชฺชาทิผลนิพฺพตฺตกา. อปิจ "โย สพฺพลหุโส ๒- ปาณาติปาตสฺส วิปาโก โส มนุสฺสภูตสฺส อปฺปายุกสํวตฺตนิโก โหตี"ติ เอวมาทินาปิ ๓- นเยเนตฺถ ผลโตปิ วิญฺญาตพฺโพ วินิจฺฉโย.

อปิเจตฺถ ปาณาติปาตาทิเวรมณีนมฺปิ สมุฏฺฐานเวทนามูลกมฺมผลโต วิญฺญาตพฺโพ วินิจฺฉโย. ตตฺถายํ วิญฺญาปนา:- สพฺพา เอว เจตา เวรมณิโย จตูหิ สมุฏฺฐหนฺติ กายโต กายจิตฺตโต วาจาจิตฺตโต กายวาจาจิตฺตโต จาติ. สพฺพา เอว จ สุขเวทนาสมฺปยุตฺตา วา อทุกฺขมสุขเวทนาสมฺปยุตฺตา วา, ตถา อโลภาโทสาโมหมูลา วา อโลภาโทสมูลา วา. จตสฺโสปิ เจตฺถ กายกมฺมํ, มุสาวาทา เวรมณี วจีกมฺมํ, มคฺคกฺขเณ จ จิตฺตโตว สมุฏฺฐหนฺติ, สพฺพาปิ มโนกมฺมํ.