๗. เทวทตฺตวตฺถุ. (๗)

"อนิกฺกสาโวติ อิมํ ธมฺมเทสนํ สตฺถา เชตวเน วิหรนฺโต ราชคเห เทวทตฺตสฺส คนฺธารกาสาวลาภํ อารพฺภ กเถสิ.

เอกสฺมึ หิ สมเย เทฺว อคฺคสาวกา ปญฺจสเต ปญฺจสเต อตฺตโน ปริวาเร อาทาย สตฺถารํ อาปุจฺฉิตฺวา เชตวนโต ราชคหํ อคมํสุ. ราชคหวาสิโน เทฺวปิ ตโยปิ พหูปิ เอกโต หุตฺวา อาคนฺตุกทานํ อทํสุ. อเถกทิวสํ อายสฺมา สารีปุตฺโต อนุโมทนํ กโรนฺโต "อุปาสกา เอโก สยํ ทานํ เทติ, ปรํ น สมาทเปติ; โส นิพฺพตฺตนิพฺพตฺตฏฺฐาเน โภคสมฺปทํ ลภติ, โน ปริวารสมฺปทํ, เอโก ปรํ สมาทเปติ, สยํ น เทติ; นิพฺพตฺตนิพฺพตฺตฏฺฐาเน ปริวารสมฺปทํ ลภติ, โน โภคสมฺปทํ, เอโก สยํปิ น เทติ, ปรํปิ น สมาทเปติ; โส นิพฺพตฺตนิพฺพตฺตฏฺฐาเน กญฺชิกมตฺตํปิ กุจฺฉิปูรํ น ลภติ, อนาโถ โหติ นิปฺปจฺจโย, เอโก สยํปิ เทติ, ปรํปิ สมาทเปติ; โส นิพฺพตฺตนิพฺพตฺตฏฺฐาเน อตฺตภาวสเตปิ อตฺตภาวสหสฺเสปิ อตฺตภาวสตสหสฺเสปิ โภคสมฺปทญฺเจว ปริวารสมฺปทญฺจ ลภตีติ เอวํ ธมฺมํ เทเสสิ. ตเมโก ปณฺฑิตปุริโส สุตฺวา "อจฺฉริยา วต โภ ธมฺมเทสนา, สุขการณํ กถิตํ; มยา อิมาสํ ทฺวินฺนํ สมฺปตฺตีนํ นิปฺผาทนกกมฺมํ กาตุํ วฏฺฏตีติ จินฺเตตฺวา " ภนฺเต เสฺว มยฺหํ ภิกฺขํ คณฺหถาติ เถรํ นิมนฺเตสิ. "กิตฺตเกหิ เต ภิกฺขูหิ อตฺโถ อุปาสกาติ. "กิตฺตกา ปน โว ภนฺเต ปริวาราติ. "สหสฺสมตฺตา อุปาสกาติ. "สพฺเพหิ สทฺธึเยว ภิกฺขํ คณฺหถ ภนฺเตติ. เถโร อธิวาเสสิ. อุปาสโก นครวีถิยํ จรนฺโต "อมฺมตาตา มยา ภิกฺขุสหสฺสํ นิมนฺติตํ, ตุมฺเห กิตฺตกานํ ภิกฺขูนํ ภิกฺขํ ทาตุํ สกฺขิสฺสถ, ตุมฺเห กิตฺตกานนฺติ สมาทเปติ. มนุสฺสา อตฺตโน อตฺตโน ปโหนกนิยาเมน "มยํ ทสนฺนํ ทสฺสาม, มยํ วีสติยา, มยํ สตสฺสาติ อาหํสุ. อุปาสโก "เตนหิ เอกสฺมึ ฐาเน สมาคมํ กตฺวา เอกโตว ปจิสฺสาม, สพฺเพ เตลติลตณฺฑุลสปฺปิผาณิตาทีนิ สมาหรถาติ เอกสฺมึ ฐาเน สมาหราเปสิ. อถสฺส เอโก กุฏุมฺพิโก สตสหสฺสคฺฆนกํ คนฺธารกาสาววตฺถํ ทตฺวา "สเจ เต ทานวฏฺฏํ นปฺปโหติ, อิทํ วิสฺสชฺเชตฺวา, ยทูนํ, ตํ ปูเรยฺยาสิ; สเจ ปโหติ, ยสฺส อิจฺฉสิ; ตสฺส ภิกฺขุโน ทเทยฺยาสีติ อาห. ตทา ตสฺส สพฺพํ ทานวฏฺฏํ ปโหสิ, กิญฺจิ อูนนฺนาม นาโหสิ. โส มนุสฺเส ปุจฺฉิ "อิทํ อนคฺฆกาสาวํ เอเกน กุฏุมฺพิเกน เอวํ นาม วตฺวา ทินฺนํ, ทานวฏฺฏํ อติเรกํ ชาตํ, กสฺสิทํ เทมาติ. เอกจฺเจ "สารีปุตฺตตฺเถรสฺสาติ อาหํสุ. เอกจฺเจ "เถโร สสฺสปริปากสมเย อาคนฺตฺวา คมนสีโล; เทวทตฺโต อมฺหากํ มงฺคลามงฺคเลสุ สหาโย อุทกมณิโก วิย นิจฺจํ ปติฏฺฐิโต, ตสฺส ตํ เทมาติ อาหํสุ. สมฺพหุลิกาย กถายปิ "เทวทตฺตสฺส ทาตพฺพนฺติ วตฺตาโร พหุตรา อเหสุํ. อถ นํ เทวทตฺตสฺส อทํสุ. โส ตํ ฉินฺทิตฺวา สิพฺพิตฺวา รชิตฺวา นิวาเสตฺวา ปารุปิตฺวา วิจรติ. มนุสฺสา ตํ ทิสฺวา "นยิทํ เทวทตฺตสฺส อนุจฺฉวิกํ; สารีปุตฺตตฺเถรสฺส อนุจฺฉวิกํ; เทวทตฺโต อตฺตโน อนนุจฺฉวิกํ นิวาเสตฺวา ปารุปิตฺวา วิจรตีติ วทึสุ.