เตสํ ตตฺถ วสนฺตานํ, มหาปนฺถกทารโก อญฺเญ ทารเก "จูฬปิตา มหาปิตาติ "อยฺยโก อยฺยิกาติ จ วทนฺเต สุตฺวา มาตรํ ปุจฺฉิ "อมฺม อญฺเญ ทารกา `อยฺยโกติ วทนฺติ `อยฺยิกาติ วทนฺติ, กจฺจิ อมฺหากํ ญาตกา นตฺถีติ. "อาม ตาต อมฺหากํ เอตฺถ ญาตกา นตฺถิ, ราชคหนคเร ปน โว ธนเสฏฺฐี นาม อยฺยโก, ตตฺถ อมฺหากํ พหู ญาตกาติ. "กสมา ตตฺถ น คจฺฉาม อมฺมาติ. สา อตฺตโน อาคมนการณํ ปุตฺตสฺส อกเถตฺวา, ปุตฺเตสุ ปุนปฺปุนํ กเถนฺเตสุ, สามิกํ อาห "อิเม มํ ทารกา อติวิย กิลเมนฺติ, กึ โน มาตาปิตโร ทิสฺวา มํสํ ขาทิสฺสนฺติ, เอหิทานิ ทารกานํ อยฺยกกุลํ ทสฺเสสฺสามาติ. "อหํ สมฺมุขา ภวิตุํ น สกฺขิสฺสามิ, เต ปน นยิสฺสามีติ. "สาธุ เยน เกนจิ อุปาเยน ทารกานํ อยฺยกกุลเมว ทฏฺฐุํ วฏฺฏตีติ. เทฺวปิ ชนา ทารเก อาทาย อนุปุพฺเพน ราชคหํ ปตฺวา นครทฺวาเร เอกิสฺสา สาลาย วสึสุ. ทารกมาตา เทฺว ทารเก คเหตฺวา อาคตภาวํ มาตาปิตูนํ อาโรจาเปสิ. เต ตํ สาสนํ สุตฺวา "สํสาเร วิจรนฺตานํ น ปุตฺโต น ธีตา ภูตปุพฺพา นาม นตฺถิ; เต อมฺหากํ มหาปราธิกา, น สกฺกา เตหิ อมฺหากํ จกฺขุปเถ ฐาตุํ, เอตฺตกนฺนาม ธนํ คเหตฺวา เทฺวปิ ชนา ผาสุกฏฺฐานํ คนฺตฺวา ชีวนฺตุ, ทารเก ปน อิธ เปเสนฺตูติ. เต เตหิ เปสิตํ ธนํ คเหตฺวา ทารเก อาคตทูตานญฺเญว หตฺเถ ๑- ทตฺวา ปหิณึสุ. ทารกา อยฺยกกุเล วฑฺฒนฺติ.

เตสุ จูฬปนฺถโก อติทหโร, มหาปนฺถโก ปน อยฺยเกน สทฺธึ ทสพลสฺส ธมฺมกถํ โสตุํ คจฺฉติ. ตสฺส นิจฺจํ สตฺถุ สนฺติกํ คจฺฉนฺตสฺส, ปพฺพชฺชาย จิตฺตํ นมิ. โส อยฺยกํ อาห "สเจ มํ อนุชาเนยฺยาถ, อหํ ปพฺพเชยฺยนฺติ. "กึ วเทสิ ตาต, สกลโลกสฺสาปิ เม ปพฺพชิตโต ตว ปพฺพชฺชา ภทฺทกา; สเจ สกฺโกสิ, ปพฺพชาหีติ ตํ สตฺถุ สนฺติกํ เนตฺวา, "กึ คหปติ ทารโก เต ลทฺโธติ วุตฺเต, "อาม ภนฺเต อยํ เม นตฺตา ตุมฺหากํ สนฺติเก ปพฺพชิตุกาโมติ อาห. สตฺถา อญฺญตรํ ปิณฺฑจาริกํ ภิกฺขุํ "อิมํ ทารกํ ปพฺพาเชหีติ อาณาเปสิ. เถโร ตสฺส ตจปญฺจกกมฺมฏฺฐานํ อาจิกฺขิตฺวา ปพฺพาเชสิ. โส พหุํ พุทฺธวจนํ อุคฺคณฺหิตฺวา ปริปุณฺณวสฺโส อุปสมฺปทํ ลภิตฺวา โยนิโสมนสิกาเร กมฺมํ กโรนฺโต อรหตฺตํ ปาปุณิ.

โส ฌานสุเขน ผลสุเขน วีตินาเมนฺโต จินฺเตสิ "สกฺกา นุ โข อิมํ สุขํ จูฬปนฺถกสฺส ทาตุนฺติ ตโต อยฺยกเสฏฺฐิสฺส สนฺติกํ คนฺตฺวา เอวมาห "มหาเสฏฺฐิ สเจ อนุชาเนยฺยาถ, อหํ จูฬปนฺถกํ ปพฺพาเชยฺยนฺติ. "ปพฺพาเชถ นํ ภนฺเตติ. เสฏฺฐี กิร สาสเน สุปฺปสนฺโน "กตรธีตาย โว เอเต ปุตฺตาติ ปุจฺฉิยมาโน จ "ปลาตธีตายาติ วตฺตุํ ลชฺชติ; ตสฺมา สุเขเนว เตสํ ปพฺพชฺชํ อนุชานาติ. เถโร จูฬปนฺถกํ ปพฺพาเชตฺวา สีเลสุ ปติฏฺฐาเปสิ. โสปิ ปพฺพชิตฺวาว ทนฺโธ อโหสิ. เถโร ตํ อนุสิกฺขนฺโต อิมํ คาถมาห