สุชาตา ปน กาลํ กตฺวา เอกิสฺสา คิริกนฺทราย พกสกุณิกา หุตฺวา นิพฺพตฺติ. สกฺโก อตฺตโน ปริจาริกาโย โอโลเกนฺโต "สุธมฺมา อิเธว นิพฺพตฺตา. ตถา สุนนฺทา จ สุจิตฺตา จาติ ญตฺวา "สุชาตา นุ โข กุหึ นิพฺพตฺตาติ จินฺเตนฺโต ตํ ตตฺถ นิพฺพตฺตํ ทิสฺวา "อยํ พาลา กิญฺจิ ปุญฺญํ อกตฺวา อิทานิ ติรจฺฉานโยนิยํ นิพฺพตฺตา, อิทานิปิ นํ ปุญฺญํ การาเปตฺวา อิธาเนตุํ วฏฺฏตีติ, อตฺตภาวํ วิชหิตฺวา อญฺญาตกเวเสน ตสฺสา สนฺติกํ คนฺตฺวา "กึ กโรนฺตี อิธ วิจรสีติ ปุจฺฉิ. "โก ปน ตฺวํ สามีติ. "อหํ เต สามิโก มโฆติ. "กุหึ นิพฺพตฺโตสิ สามีติ. "อหํ ตาวตึสเทวโลเก นิพฺพตฺโตมฺหิ, ตว สหายิกานํ ปน นิพฺพตฺตฏฺฐานํ ชานาสีติ. "น ชานามิ สามีติ. "ตาปิ มเมว สนฺติเก นิพฺพตฺตา, ปสฺสิสฺสสิ เต สหายิกาติ. "กถาหํ ตตฺถ คมิสฺสามีติ. สกฺโก "อหํ ตํ ตตฺถ เนสฺสามีติ วตฺวา เทวโลกํ เนตฺวา นนฺทาย โปกฺขรณิยา ตีเร วิสฺสชฺเชตฺวา อิตราสํ ติสฺสนฺนํ อาโรเจสิ "ตุมฺหากํ สหายิกํ สุชาตํ ปสฺสิสฺสถาติ. "กุหึ สา เทวาติ. "นนฺทาย โปกฺขรณิยา ตีเร ฐิตาติ อาห. ตา ติสฺโสปิ ตตฺถ คนฺตฺวา "อโห อยฺยาย รูปํ, อโห อตฺตภาวมณฺฑนสฺส ผลํ: อิทานิสฺสา ตุณฺฑํ ปสฺสถ, ชงฺฆา ปสฺสถ, ปาเท ปสฺสถ, โสภติ วตสฺสา อตฺตภาโวติ เกฬึ กตฺวา ปกฺกมึสุ. ปุน สกฺโก ตสฺสา สนฺติกํ คนฺตฺวา "ทิฏฺฐา เต สหายิกาติ วตฺวา, "ทิฏฺฐา มํ อุปฺผณฺเฑตฺวา คตา, ตตฺเถว มํ เนหีติ วุตฺเต, ตํ ตตฺเถว เนตฺวา อุทเก วิสฺสชฺเชตฺวา "ทิฏฺฐา เต ตาสํ สมฺปตฺตีติ ปุจฺฉิ. "ทิฏฺฐา เม เทวาติ. "ตยาปิ ตตฺถ นิพฺพตฺตนุปายํ กาตุํ วฏฺฏตีติ. "กึ กโรมิ เทวาติ. "มยา ทินฺนํ โอวาทํ รกฺขิสฺสสีติ. "รกฺขิสฺสามิ เทวาติ. อถสฺสา ปญฺจ สีลานิ ทตฺวา "อปฺปมตฺตา รกฺขาหีติ วตฺวา ปกฺกามิ. สา ตโต ปฏฺฐาย สยํ มตมจฺฉเกเยว ปริเยสิตฺวา ขาทติ. สกฺโก กติปาหจฺจเยน ตสฺสา วีมํสนตฺถาย คนฺตฺวา วาลุกาปิฏฺเฐ มตมจฺฉโก วิย หุตฺวา อุตฺตาโน นิปชฺชิ. สา ตํ ทิสฺวา "มตมจฺฉโกติ สญฺญาย อคฺคเหสิ. มจฺโฉ คิลนกาเล นงฺคุฏฺฐํ จาเลสิ. สา "ชีวมจฺฉโกติ อุทเก วิสฺสชฺเชสิ. โส โถกํ วีตินาเมตฺวา ปุน ตสฺสา ปุรโต อุตฺตาโน หุตฺวา นิปชฺชิ. ปุน สา "มตมจฺฉโกติ สญฺญาย คเหตฺวา คิลนกาเล อคฺคนงฺคุฏฺฐํ จาเลนฺตํ ทิสฺวา "ชีวมจฺโฉติ วิสฺสชฺเชสิ. เอวํ ติกฺขตฺตุํ วีมํสิตฺวา "สาธุกํ สีลํ รกฺขสีติ อตฺตานํ ชานาเปตฺวา "อหํ ตว วีมํสนตฺถาย อาคโต, สาธุกํ สีลํ รกฺขสิ, เอวํ รกฺขมานา นจิรสฺเสว มม สนฺติเก นิพฺพตฺติสฺสสิ, อปฺปมตฺตา โหหีติ วตฺวา ปกฺกามิ. สา ตโต ปฏฺฐาย สยํ มตมจฺฉํ ลภติ วา โน วา, อลภมานา กติปาหจฺจเยเนว สุสฺสิตฺวา กาลํ กตฺวา ตสฺส สีลสฺส ผเลน พาราณสิยํ กุมฺภการสฺส ธีตา หุตฺวา นิพฺพตฺติ.