ตกฺกสิลายํ เสฏฺฐิปุตฺเตน สทฺธึ สํวาสมนฺวาย ปนสฺสา กุจฺฉิยํ คพฺโภ ปติฏฺฐาสิ. สา ทสมาสจฺจเยน ปุตฺตํ ลภิตฺวา ตสฺส ปทสา คมนกาเล อปรํปิ ปุตฺตํ ปฏิลภิ เอวมสฺสา กุจฺฉิยํ วุตฺถา เทฺว ปุตฺตา อเหสุํ, โสเรยฺยนคเร ตํ ปฏิจฺจ นิพฺพตฺตา เทฺวติ จตฺตาโร ปุตฺตา อเหสุํ.

ตสฺมึ กาเล โสเรยฺยนครโต โย ตสฺสา สหายโก เสฏฺฐิปุตฺโต โส ปญฺจหิ สกฏสเตหิ ตกฺกสิลํ คนฺตฺวา สุขยานเก นิสินฺโน นครํ ปาวิสิ. อถ นํ สา อุปริปาสาทตเล วาตปานํ วิวริตฺวา อนฺตรวีถึ โอโลกยมานา ฐิตา ทิสฺวา ตํ สญฺชานิตฺวา ทาสึ เปเสตฺวา ตํ ปกฺโกสาเปตฺวา มหาตเล นิสีทาเปตฺวา มหนฺตํ สกฺการสมฺมานํ อกาสิ. อถ นํ โส อาห "ภทฺเท ตฺวํ อิโต ปุพฺเพ อมฺเหหิ น ทิฏฺฐปุพฺพา, อถ จ ปน โน มหนฺตํ สกฺการํ กโรสิ; ชานาสิ ตฺวํ อมฺเหติ. "อาม สามิ ชานามิ, นนุ ตุมฺเห โสเรยฺยนครวาสิโนติ. "อาม ภทฺเทติ. สา มาตาปิตูนญฺจ ภริยาย จ ปุตฺตานญฺจ อโรคภาวํ ปุจฺฉิ. อิตโร "อาม ภทฺเท อโรคาติ วตฺวา "อมฺม ชานาสิ ตฺวํ เอเตติ อาห. "อาม สามิ ชานามิ, เตสํ เอโก ปุตฺโต อตฺถิ, โส กหนฺติ. "ภทฺเท เอตํ มา กเถสิ; มยํ เตน สทฺธึ เอกทิวสํ สุขยานเก นิสีทิตฺวา นหายิตุํ นิกฺขนฺตา เนวสฺส คตึ ชานาม, อิโต จิโต จ วิจริตฺวา ตํ อทิสฺวา มาตาปิตูนํ อาโรจยิมฺหา, เตปิสฺส โรทิตฺวา กนฺทิตฺวา เปตกิจฺจํ กรึสูติ. "อหํ โส สามีติ. "อเปหิ ภทฺเท, กึ กเถสิ, มยฺหํ สหายโก เทวกุมาโร วิย โสภติ, เอโส ปุริโสติ. "โหตุ สามิ, อหํ โสติ. อถ นํ "อิทํ กึ นามาติ. "ตํทิวสนฺเต อยฺโย มหากจฺจายนตฺเถโร ทิฏฺโฐติ. "อาม ทิฏฺโฐติ. "อหํ อยฺยํ มหากจฺจายนตฺเถรํ โอโลเกตฺวา `อโห วต อยํ วา เถโร มม ภริยา ภเวยฺย, เอตสฺส วา สรีรวณฺโณ วิย มม ภริยาย สรีรวณฺโณ ภเวยฺยาติ จินฺเตสึ; จินฺติตกฺขเณเยว ปุริสลิงฺคํ อนฺตรธายิ, อิตฺถีลิงฺคํ ปาตุภวิ; อถาหํ ลชฺชาย กสฺสจิ วตฺตุํ อสกฺกุณิตฺวา ตโต ปลายิตฺวา อิธาคตา สามีติ. "อโห เต ภาริยํ กมฺมํ กตํ, กสฺมา มยฺหํ นาจิกฺขิ, อปิจ ปน เต เถโร ขมาปิโตติ. "น ขมาปิโต สามิ, ชานาสิ ปน ตฺวํ `กหํ เถโรติ. "อิมเมว นครํ อุปนิสฺสาย วิหรตีติ. "สเจ ปิณฺฑาย จรนฺโต อิธาคจฺเฉยฺย, อหํ มม อยฺยสฺส ภิกฺขาหารํ ทเทยฺยามีติ. "เตนหิ สีฆํ สกฺการํ กโรหิ, อมฺหากํ อยฺยํ ขมาเปสฺสามาติ. โส เถรสฺส วสนฏฺฐานํ คนฺตฺวา วนฺทิตฺวา เอกมนฺตํ นิสินฺโน "ภนฺเต เสฺว มยฺหํ ภิกฺขํ คณฺหถาติ อาห. "นนุ ตฺวํ เสฏฺฐิปุตฺต อาคนฺตุโกสีติ. "ภนฺเต มา อมฺหากํ อาคนฺตุกภาวํ ปุจฺฉถ, เสฺว เม ภิกฺขํ คณฺหถาติ. เถโร อธิวาเสสิ. เคเหปิ เถรสฺส มหาสกฺกาโร ปฏิยตฺโต. เถโร ปุนทิวเส ตํ เคหทฺวารํ อคมาสิ. อถ นํ นิสีทาเปตฺวา ปณีเตน อาหาเรน ปริวิสิตฺวา เสฏฺฐิปุตฺโต ตํ อิตฺถึ คเหตฺวา เถรสฺส ปาทมูเล นิปชฺชาเปตฺวา "ภนฺเต มยฺหํ สหายิกาย ขมถาติ อาห. "กิเมตนฺติ "อยํ ภนฺเต ปุพฺเพ มยฺหํ ปิยสหายโก หุตฺวา ตุมฺเห โอโลเกตฺวา เอวํ นาม จินฺเตสิ; อถสฺส ปุริสลิงฺคํ อนฺตรธายิ, อิตฺถีลิงฺคํ ปาตุภวิ; ขมถ ภนฺเตติ. "เตนหิ อุฏฺฐหถ, ขมามิ โว อหนฺติ. เถเรน "ขมามีติ วุตฺตมตฺเตเยว, อิตฺถีลิงฺคํ อนฺตรธายิ. ปุริสลิงฺคํ ปาตุภวิ.